ചെന്നൈ: പ്രമുഖ ഒടിടി പ്ലാറ്റ്ഫോമായ സോണി ലിവ് തമിഴും തെന്നിന്ത്യൻ സൂപ്പർതാരം സാമന്ത റൂത്ത് പ്രഭുവും പുതിയ സംരംഭത്തിനായി ഒന്നിക്കുന്നു. ഇൻസ്റ്റാഗ്രാമിലൂടെ താരം തന്നെയാണ് ഈ സർപ്രൈസ് കൂട്ടുകെട്ടിന്റെ പ്രഖ്യാപനം നടത്തിയത്.
2026-ൽ വേറിട്ട സൃഷ്ടിപരമായ പരീക്ഷണങ്ങളുമായി മുന്നോട്ട് പോകുന്ന സാമന്തയുടെ കരിയറിലെ മറ്റൊരു ശ്രദ്ധേയ അധ്യായമായിരിക്കും ഈ സഹകരണമെന്നാണ് സൂചന. പദ്ധതിയുടെ കൂടുതൽ വിശദാംശങ്ങൾ നിലവിൽ പുറത്തുവിട്ടിട്ടില്ലെങ്കിലും, പ്രേക്ഷകരെ അത്ഭുതപ്പെടുത്തുന്ന വമ്പൻ പ്രൊജക്റ്റാണ് അണിയറയിൽ ഒരുങ്ങുന്നതെന്നാണ് റിപ്പോർട്ടുകൾ.
”മാറ്റങ്ങളെ സ്വീകരിക്കാനും യാത്രയെ വിശ്വസിക്കാനും പുതിയ തുടക്കങ്ങളെ സ്വാഗതം ചെയ്യാനും ഈ വർഷം എന്നെ പഠിപ്പിച്ചു. സോണി ലിവ് തമിഴിനൊപ്പം ഈ പുതിയ അധ്യായം ആരംഭിക്കുന്നതിൽ എനിക്ക് ഏറെ സന്തോഷമുണ്ട്. ഞങ്ങൾ വളരെ ആവേശകരമായ ഒന്നിനുവേണ്ടി പ്രവർത്തിക്കുകയാണ്. അത് ഉടൻ എല്ലാവരുമായി പങ്കുവെക്കാൻ കഴിയുമെന്ന് പ്രതീക്ഷിക്കുന്നു.”
— സാമന്ത റൂത്ത് പ്രഭു
എന്നാണ് താരം പോസ്റ്റിൽ കുറിച്ചത്.
എന്നും ധീരമായ തീരുമാനങ്ങളിലൂടെയും വൈവിധ്യമാർന്ന കഥാപാത്രങ്ങളിലൂടെയും ശ്രദ്ധ നേടിയിട്ടുള്ള താരത്തിന്റെ ഈ പുതിയ നീക്കം ഇതിനോടകം തന്നെ ആരാധകർക്കിടയിൽ വലിയ കൗതുകമുണർത്തിയിട്ടുണ്ട്. സാമന്തയുടെ താരമൂല്യവും മികച്ച കണ്ടന്റുകൾ പ്രേക്ഷകരിലേക്ക് എത്തിക്കുന്നതിലുള്ള സോണി ലിവിന്റെ പ്രതിബദ്ധതയും ഒന്നിക്കുമ്പോൾ വൻ വിജയത്തിൽ കുറഞ്ഞതൊന്നും സിനിമാലോകം പ്രതീക്ഷിക്കുന്നില്ല. പ്രൊജക്റ്റിനെക്കുറിച്ചുള്ള കൂടുതൽ ഔദ്യോഗിക വിവരങ്ങൾ വരും ദിവസങ്ങളിൽ പുറത്തുവിടുമെന്നാണ് സൂചന.
