ശ്രീനാരായണ ദിവ്യജ്യോതി പര്യടനം — അഞ്ചാം ദിവസം സമാപനം
മനയ്ക്കപ്പടിയിൽ ഭക്തിസാന്ദ്രമായ സമാപനം
172-ാമത് ശ്രീനാരായണ ഗുരുദേവ ജയന്തിയോടനുബന്ധിച്ച് എസ്.എൻ.ഡി.പി. യോഗം നോർത്ത് പറവൂർ യൂണിയന്റെ നേതൃത്വത്തിൽ സംഘടിപ്പിച്ച ശ്രീനാരായണ ദിവ്യജ്യോതി പര്യടനത്തിന് ഭക്തിസാന്ദ്രമായ സമാപനം.
ഓഗസ്റ്റ് 19 മുതൽ 23 വരെ അഞ്ച് ദിവസങ്ങളിലായി 72 ശാഖായോഗങ്ങളിലൂടെ സഞ്ചരിച്ച ദിവ്യജ്യോതി, ഗുരുദേവന്റെ കരുണാകിരണങ്ങളും സ്നേഹത്തിന്റെയും സാഹോദര്യത്തിന്റെയും സന്ദേശവും ജനഹൃദയങ്ങളിൽ പകർന്നുകൊണ്ട് അഞ്ചാം ദിവസം മനയ്ക്കപ്പടി ശാഖായോഗത്തിൽ എത്തി സമാപനം കുറിച്ചു.
അഞ്ചാം ദിവസത്തെ പര്യടനം രാവിലെ 10 മണിക്ക് മന്നം തത്തപ്പിള്ളി ശാഖയിൽ നിന്ന് ആരംഭിച്ചു. തുടർന്ന് വിവിധ ശാഖകളിലൂടെ പ്രയാണം പൂർത്തിയാക്കി മനയ്ക്കപ്പടി എസ്.എൻ.ഡി.പി. ശാഖായോഗത്തിൽ എത്തിച്ചേർന്നപ്പോൾ ഭക്തജനങ്ങൾ ദിവ്യജ്യോതിയെ പ്രാർത്ഥനാപൂർവ്വം സ്വീകരിച്ചു.
“ഒരു ജാതി, ഒരു മതം, ഒരു ദൈവം മനുഷ്യന്” എന്ന ഗുരുദേവ സന്ദേശം ഹൃദയങ്ങളിൽ കൂടുതൽ ആഴത്തിൽ പതിപ്പിച്ച ഈ യാത്ര, ഒരു പര്യടനത്തിന്റെ അവസാനമല്ല; മറിച്ച് ഗുരുസന്ദേശത്തിന്റെ വെളിച്ചം ജീവിതത്തിലേക്ക് പകരാനുള്ള പുതിയൊരു തുടക്കമാണ്.
ദിവ്യജ്യോതി പര്യടനത്തിന് ജാഥാ ക്യാപ്റ്റൻ യൂണിയൻ കൺവീനർ ശ്രീ ഷൈജു മനക്കപ്പടി, ചെയർമാൻ ശ്രീ എൻ. രാധാകൃഷ്ണൻ, യോഗം കൗൺസിലർ ഷീബ ടീച്ചർ, ഡയറക്ടർ ബോർഡ് അംഗങ്ങളായ ശ്രീ പി. എസ്. ജയരാജ്, ശ്രീ എം. പി. ബിനു, ഇൻസ്പെക്ടിംഗ് ഓഫീസർ ശ്രീ ഡി. ബാബു, അഡ്മിനിസ്ട്രേറ്റീവ് കമ്മിറ്റി അംഗങ്ങളായ കണ്ണൻ കൂട്ടുകാട്, വി. എൻ. നാഗേഷ്, കെ. ബി. സുഭാഷ്, ടി. എം. ദിലീപ്, വി. പി. ഷാജി എന്നിവരും യൂണിയൻ തല പോഷക സംഘടനാ ഭാരവാഹികളും നേതൃത്വം നൽകി.
അഞ്ചു ദിവസങ്ങൾ… 72 ശാഖകൾ… ആയിരക്കണക്കിന് ഹൃദയങ്ങൾ…
ഒടുവിൽ ദിവ്യജ്യോതി മനയ്ക്കപ്പടിയിൽ വിശ്രമിച്ചപ്പോൾ, തെളിഞ്ഞത് ഒരു വിളക്കല്ല—ഗുരുദേവന്റെ മഹത്തായ സന്ദേശത്തിന്റെ അണയാത്ത വെളിച്ചമാണ്.
