🔴ജോലിക്ക് മുമ്പ് പൊലീസ് ക്ലിയറൻസ്; എയ്ഡഡ് സ്‌കൂൾ നിയമനത്തിൽ പുതിയ ചട്ടം..!!

തിരുവനന്തപുരം: സംസ്ഥാനത്തെ എയ്ഡഡ് സ്‌കൂളുകളിലെ അധ്യാപക, അനധ്യാപക നിയമനങ്ങൾക്ക് പൊലീസ് വെരിഫിക്കേഷൻ നിർബന്ധമാക്കി വിദ്യാഭ്യാസ വകുപ്പ്. ക്രിമിനൽ കേസുകളിൽ ഉൾപ്പെട്ടവർ സർവീസിൽ പ്രവേശിക്കുന്നത് തടയുന്നതിന്റെ ഭാഗമായാണ് നടപടി. ഇത് സംബന്ധിച്ച ഉത്തരവ് വിദ്യാഭ്യാസ വകുപ്പ് പുറത്തിറക്കി.

നേരത്തെ ഇതുസംബന്ധിച്ച് ആഭ്യന്തര വകുപ്പും ഉത്തരവ് പുറപ്പെടുവിച്ചിരുന്നു. പൊതുമേഖലാ സ്ഥാപനങ്ങൾ, ക്ഷേമനിധി ബോർഡുകൾ, സഹകരണ സ്ഥാപനങ്ങൾ തുടങ്ങിയവയിൽ നിയമനം ലഭിക്കുന്നവർ ജോലിയിൽ പ്രവേശിച്ച് ഒരു മാസത്തിനകം പൊലീസ് വെരിഫിക്കേഷൻ പൂർത്തിയാക്കണമെന്നായിരുന്നു നിർദേശം. ഇതിന്റെ അടിസ്ഥാനത്തിലാണ് എയ്ഡഡ് സ്‌കൂൾ നിയമനങ്ങളിലും പൊലീസ് പരിശോധന നിർബന്ധമാക്കിയത്.

എയ്ഡഡ് സ്‌കൂൾ ജീവനക്കാരുടെ നിയമന അംഗീകാരത്തിനായി സമർപ്പിക്കേണ്ട രേഖകളിൽ ഇനി പൊലീസ് വെരിഫിക്കേഷൻ പെർഫോമയും ഉൾപ്പെടുത്തണം. ഈ പെർഫോമയുടെ അടിസ്ഥാനത്തിൽ നിയമന അംഗീകാര അധികാരികൾ ബന്ധപ്പെട്ട പൊലീസ് ഉദ്യോഗസ്ഥരിൽനിന്ന് റിപ്പോർട്ട് തേടണം.

പൊലീസ് റിപ്പോർട്ട് കൂടി പരിശോധിച്ച ശേഷമേ നിയമനത്തിന് അംഗീകാരം നൽകാവൂ എന്നും വിദ്യാഭ്യാസ വകുപ്പിന്റെ ഉത്തരവിൽ വ്യക്തമാക്കുന്നു. ഇതിന് ആവശ്യമായ ഭേദഗതികൾ കേരള വിദ്യാഭ്യാസ ചട്ടങ്ങളിലും വരുത്തും.