തെഹ്റാന്‍: അമേരിക്കൻ ഉപരോധത്തിന്റെ സമ്മർദം ശക്തമാകുന്നതിനിടെ ഇറാന്റെ വ്യോമയാന മേഖലയ്ക്ക് തിരിച്ചടി. ഇറാൻ വിമാനക്കമ്പനികളുടെ യു.എ.ഇയിലേക്കും തിരിച്ചുമുള്ള സർവീസുകൾക്ക് യു.എ.ഇ വിലക്കേർപ്പെടുത്തി. സെപ്റ്റംബർ 24 മുതൽ പ്രാബല്യത്തിൽ വന്ന നിയന്ത്രണം അടുത്ത അറിയിപ്പ് വരെ തുടരുമെന്ന് യു.എ.ഇ ജനറൽ സിവിൽ ഏവിയേഷൻ അതോറിറ്റി അറിയിച്ചു. അമേരിക്കൻ ഉപരോധത്തെ തുടർന്ന് ഇറാൻ വിമാനക്കമ്പനികൾക്ക് വിവിധ രാജ്യങ്ങളിലെ വിമാനത്താവളങ്ങൾ ഉപയോഗിക്കുന്നതിൽ നിയന്ത്രണം നേരിടുന്ന സാഹചര്യത്തിലാണ് യു.എ.ഇയുടെ നടപടി.
ഒമാൻ, ഇറാഖ്, അസർബൈജാൻ, ജോർജിയ, തുർക്ക്മെനിസ്ഥാൻ എന്നിവയ്ക്ക് പിന്നാലെയാണ് യു.എ.ഇയും ഇറാൻ വിമാനങ്ങൾക്ക് വിലക്കേർപ്പെടുത്തിയത്. ഇറാൻ വിമാനക്കമ്പനികളുടെ പ്രധാനപ്പെട്ട അന്താരാഷ്ട്ര കേന്ദ്രവും കൂടിയാണ് ദുബൈ. ദിവസേന നിരവധി സർവീസുകൾ ഇവിടെനിന്നും ഇറാനിലേക്കും തിരിച്ചും നടത്തിയിരുന്നു. ഇരുരാജ്യങ്ങൾക്കുമിടയിൽ ശക്തമായ വ്യാപാരബന്ധങ്ങൾ നിലനിൽക്കുന്ന സാഹചര്യത്തിലാണ് വിമാന സർവീസുകൾ നിർത്തിവെച്ചത്. വ്യാഴാഴ്ച തെഹ്‌റാനിൽ നിന്ന് ദുബൈയിലേക്ക് പുറപ്പെടേണ്ടിയിരുന്ന ഇറാൻ എയർടൂർ വിമാനത്തിന്റെ സർവീസും ഇതോടെ റദ്ദാക്കി. യാത്രക്കാർക്ക് ടിക്കറ്റുകൾ നൽകിയതിനു ശേഷമാണ് വിമാനം റദ്ദാക്കിയത്. അതേസമയം, ഇറാനുമായുള്ള വ്യാപാര-സാമ്പത്തിക ഇടപാടുകൾ കഴിഞ്ഞ മാസം യു.എ.ഇ നിർത്തിവെച്ചിരുന്നു. ബുധനാഴ്ച ഇറാന്റെ ബാങ്ക് മെല്ലിയുമായി ബന്ധപ്പെട്ട ഇടപാടുകൾക്കും യു.എ.ഇ സെൻട്രൽ ബാങ്ക് നിയന്ത്രണം ഏർപ്പെടുത്തി. കള്ളപ്പണം വെളുപ്പിക്കൽ, ഭീകരവാദം, ആയുധവ്യാപനം എന്നിവയുമായി ബന്ധപ്പെട്ട ചട്ടങ്ങൾ ലംഘിച്ചെന്നായിരുന്നു യു.എ.ഇയുടെ ആരോപണം.
