പുതുശ്ശേരി കുട്ടപ്പ മാസ്റ്റർ സ്മാരക പുരസ്കാരം കസ്തൂർബാ ബാലികാസദനത്തിന്

​ഗുരുവായൂർ: ചരിത്രപ്രസിദ്ധമായ ഗുരുവായൂർ ക്ഷേത്രപ്രവേശന സത്യാഗ്രഹ സമര പങ്കാളിയും പ്രമുഖ സ്വാതന്ത്ര്യ സമര സേനാനിയുമായിരുന്ന പുതുശ്ശേരി കുട്ടപ്പ മാസ്റ്ററുടെ സ്മരണാർത്ഥം കുടുംബാംഗങ്ങൾ ഏർപ്പെടുത്തിയ സ്മാരക ക്യാഷ് അവാർഡ് കസ്തൂർബാ ബാലികാ സദനത്തിന് നൽകി.​ബാലികാ സദനത്തിലെ കുട്ടികളുടെ വിദ്യാഭ്യാസ – ക്ഷേമ പ്രവർത്തനങ്ങൾക്ക് വേണ്ടിയാണ് ഈ തുക വിനിയോഗിക്കുക. പതിനായിരം രൂപയും പ്രശസ്തിപത്രവുമടങ്ങുന്നതാണ് അവാർഡ്.​കുട്ടപ്പ മാസ്റ്ററുടെ മകനും ട്രസ്റ്റ് ചെയർമാനുമായ പുതുശ്ശേരി രവീന്ദ്രൻ അവാർഡ് തുക കൈമാറി. കസ്തൂർബാ ബാലികാ സദനം പ്രസിഡന്റ് പി. മുരളീധരൻ കൈമൾ, സെക്രട്ടറി സജീവൻ നമ്പിയത്ത് എന്നിവർ ചേർന്ന് അവാർഡ് ഏറ്റുവാങ്ങി. സദനത്തിൽ നടന്ന ചടങ്ങിൽ ട്രസ്റ്റ് ഭാരവാഹികളും ബാലികാസദനം പ്രവർത്തകരും പങ്കെടുത്തു.