തിരുവനന്തപുരം: ലോക പരിസ്ഥിതി ദിനത്തോടനുബന്ധിച്ച് NACTE – വൊക്കേഷണൽ ട്രെയിനിംഗ് സെന്റർ അതിന്റെ ഇരുപതാം വാർഷിക ആഘോഷങ്ങളുടെ ഭാഗമായി ജൻ ശിക്ഷൺ സൻസ്ഥാൻ (JSS) തിരുവനന്തപുരത്തിന്റെ സഹകരണത്തോടെ സംഘടിപ്പിച്ച “ഹരിതവിഷൻ 20” സ്കൂൾ തല ക്യാമ്പയിന് തുടക്കമായി. പ്രകൃതിസംരക്ഷണത്തിന്റെ പ്രാധാന്യം കുട്ടികളിലേക്ക് എത്തിക്കുക എന്ന ലക്ഷ്യത്തോടെ തിരുവനന്തപുരത്തെ വിവിധ വിദ്യാലയങ്ങൾ കേന്ദ്രീകരിച്ചാണ് ക്യാമ്പയിൻ സംഘടിപ്പിച്ചത്. വിദ്യാർത്ഥികൾക്കായി വൃക്ഷത്തൈകളുടെ കൈമാറ്റവും പ്രത്യേകമായി തയ്യാറാക്കിയ ‘സീഡ് ബോളുകളുടെ’ (Seed Balls) വിതരണവും ഇതോടൊപ്പം നടന്നു. ക്യാമ്പയിന്റെ ഭാഗമായി തിരുവല്ലം വി.എച്ച്.എസ്.എസ് ഫോർ ഗേൾസിൽ നടന്ന ചടങ്ങ് നേമം MLA ശ്രീ. രാജീവ് ചന്ദ്രശേഖർ വിദ്യാർത്ഥികൾക്ക് വൃക്ഷത്തൈകളും സീഡ് ബോളുകളും നൽകി ഉദ്ഘാടനം ചെയ്തു. വിദ്യാലയത്തിലെ വിദ്യാർത്ഥികൾക്കായി ആവേശകരമായ പോസ്റ്റർ രചനാ മത്സരവും ഇതോടൊപ്പം സംഘടിപ്പിച്ചു. NACTE മോണ്ടിസോറി ടി.ടി.സി വിദ്യാർത്ഥികൾ സ്കൂൾ കുട്ടികൾക്ക് സീഡ് ബോളുകളുടെ ഉപയോഗങ്ങളെക്കുറിച്ചും അതിന്റെ പ്രകൃതിദത്തമായ ഗുണങ്ങളെക്കുറിച്ചും വിശദീകരിക്കുന്ന ക്ലാസ്സുകൾക്ക് നേതൃത്വം നൽകി. പൂന്തുറ സെന്റ് ഫിലോമിനാസ് സ്കൂളിൽ നടന്ന ചടങ്ങിൽ NACTE കോർഡിനേറ്റർ ശ്രീ. പ്രമോദ് സ്കൂൾ മേധാവിക്ക് സീഡ് ബോൾ നൽകി ഉദ്ഘാടനം നിർവ്വഹിച്ചു. ഇവിടെയും കുട്ടികൾക്കായി പോസ്റ്റർ രചനാ മത്സരം സംഘടിപ്പിക്കുകയും NACTE മോണ്ടിസോറി ടി.ടി.സി വിദ്യാർത്ഥികൾ വൃക്ഷത്തൈകൾ കൈമാറുകയും ചെയ്തു. തിരുവല്ലം ബി.എൻ.വി.എച്ച്.എസ്.എസ് ഫോർ ബോയ്സ്, ഗവ. എൽ.പി.എസ് തിരുവല്ലം എന്നീ വിദ്യാലയങ്ങളിൽ ജൻ ശിക്ഷൺ സൻസ്ഥാൻ (JSS) തിരുവനന്തപുരം ഡയറക്ടർ ശ്രീ. സതീഷ് സ്കൂൾ മേധാവികൾക്ക് വൃക്ഷത്തൈകളും സീഡ് ബോളുകളും നൽകി ഹരിതവിഷൻ പരിപാടികൾ ഉദ്ഘാടനം ചെയ്തു. രണ്ട് വിദ്യാലയങ്ങളിലും മോണ്ടിസോറി ടി.ടി.സി വിദ്യാർത്ഥികൾ പരിസ്ഥിതി സന്ദേശങ്ങൾ പങ്കുവെച്ചു. ബി.എൻ.വി.എച്ച്.എസ്.എസിൽ കുട്ടികൾക്കായി പോസ്റ്റർ രചനാ മത്സരവും നടന്നു. കല്ലിയൂർ വിദ്യാധിരാജ വിദ്യാവിഹാർ സ്കൂളിൽ NACTE അക്കാദമിക് കോർഡിനേറ്റർ ശ്രീ. ആദർശ് സ്കൂൾ മേധാവിക്ക് വൃക്ഷത്തൈകളും സീഡ് ബോളുകളും നൽകി ഉദ്ഘാടനം നിർവ്വഹിച്ചപ്പോൾ, നേമം വ്യാസ വിദ്യാലയത്തിൽ NACTE മോണ്ടിസോറി ടി.ടി.സി വിദ്യാർത്ഥികൾ നേരിട്ട് സ്കൂൾ മേധാവിക്ക് തൈകളും സീഡ് ബോളുകളും കൈമാറി പരിപാടികൾക്ക് തുടക്കം കുറിച്ചു.ക്യാമ്പയിന്റെ ഭാഗമായി വിവിധ സ്കൂളുകളിൽ നടന്ന പോസ്റ്റർ രചനാ മത്സരങ്ങളിൽ പങ്കെടുക്കുന്ന എല്ലാ വിദ്യാർത്ഥികൾക്കും NACTE-യും JSS തിരുവനന്തപുരവും സംയുക്തമായി നൽകുന്ന ‘ഹരിതവിഷൻ’ പാർട്ടിസിപ്പേഷൻ സർട്ടിഫിക്കറ്റുകൾ വിതരണം ചെയ്യുമെന്ന് അധികൃതർ അറിയിച്ചു. വരും ദിവസങ്ങളിലും കൂടുതൽ വിദ്യാലയങ്ങളിലേക്ക് ഹരിത സന്ദേശവുമായി ക്യാമ്പയിൻ വ്യാപിപ്പിക്കാനാണ് സംഘാടകർ ലക്ഷ്യമിടുന്നത്.
സ്കൂൾ വിദ്യാർത്ഥികളിൽ ഹരിത സന്ദേശമെത്തിച്ച് NACTE “ഹരിത വിഷൻ 20” ക്യാമ്പയിൻ
