തിരുവല്ലം പരശുരാമ ക്ഷേത്രത്തിന്റെ പുനരുദ്ധാരണത്തിനും അടിസ്ഥാന സൗകര്യ വികസനത്തിനും അടിയന്തര നടപടികൾ: രാജീവ് ചന്ദ്രശേഖർ എം.എൽ.എ

വർഷങ്ങളായുള്ള അവഗണനയ്ക്ക് ഒടുവിൽ, ഏകദേശം 2000 വർഷം പഴക്കമുള്ള ചരിത്രപ്രസിദ്ധമായ തിരുവല്ലം പരശുരാമ ക്ഷേത്രത്തിന് അർഹിക്കുന്ന പരിഗണന ലഭിക്കാനുള്ള നടപടികൾ ആരംഭിച്ചിരിക്കുകയാണ്.ക്ഷേത്രത്തിന്റെ ദയനീയാവസ്ഥ പരിഹരിക്കണമെന്ന ആവശ്യവുമായി കഴിഞ്ഞ രണ്ട് വർഷമായി നിരന്തരം ഇടപെടലുകൾ നടത്തിവരികയാണ്. കർക്കിടക വാവുബലിക്ക് മുന്നോടിയായി അടിയന്തര നടപടികൾ സ്വീകരിക്കണമെന്ന് ആവശ്യപ്പെട്ട് ബന്ധപ്പെട്ട മന്ത്രിമാർക്ക് കത്തയക്കുകയും, തിരുവനന്തപുരം കോർപ്പറേഷൻ മേയറും കൗൺസിലർമാരും ഉൾപ്പെടെയുള്ള ജനപ്രതിനിധികളുടെ പങ്കാളിത്തത്തോടെ പ്രദേശവാസികളുടെയും വിശ്വാസികളുടെയും അഭിപ്രായങ്ങളും നിർദ്ദേശങ്ങളും ശേഖരിക്കുകയും ചെയ്തിരുന്നു.ദേവസ്വം വകുപ്പ് മന്ത്രി ശ്രീ. കെ. മുരളീധരന്റെ അധ്യക്ഷതയിൽ ഇന്ന് ചേർന്ന അവലോകന യോഗത്തിൽ ക്ഷേത്രം നേരിടുന്ന പ്രധാന വെല്ലുവിളികൾ വിശദമായി അവതരിപ്പിക്കുകയും അടിയന്തരമായി നടപ്പാക്കേണ്ട നിർദ്ദേശങ്ങൾ പങ്കുവയ്ക്കുകയും ചെയ്തു.ആവശ്യമായി വരുന്ന സാഹചര്യത്തിൽ ആർക്കിയോളജിക്കൽ സർവേ ഓഫ് ഇന്ത്യ (ASI) ഉൾപ്പെടെയുള്ള കേന്ദ്ര സർക്കാർ ഏജൻസികളുടെ എല്ലാ പിന്തുണയും സഹകരണവും ഉറപ്പാക്കുന്നതിന് വേണ്ട നടപടികൾ സ്വീകരിക്കുമെന്ന് യോഗത്തിൽ അറിയിച്ചു.ദീർഘകാലമായി അവഗണിക്കപ്പെട്ടുകിടക്കുന്ന ഈ ചരിത്ര-സാംസ്കാരിക പൈതൃക കേന്ദ്രത്തെ സംരക്ഷിക്കുകയും പുനരുദ്ധരിക്കുകയും ചെയ്യുക എന്നതാണ് പ്രധാന ലക്ഷ്യം. അതോടൊപ്പം, ക്ഷേത്രത്തിൽ എത്തിച്ചേരുന്ന ആയിരക്കണക്കിന് വിശ്വാസികൾക്ക് വൃത്തിയുള്ളതും സുരക്ഷിതവുമായ അന്തരീക്ഷത്തിൽ ബലിതർപ്പണ ചടങ്ങുകൾ നിർവഹിക്കാൻ ആവശ്യമായ എല്ലാ അടിസ്ഥാന സൗകര്യങ്ങളും ഉറപ്പാക്കുന്നതിനാണ് മുൻഗണന നൽകുന്നത്.തിരുവല്ലം പരശുരാമ ക്ഷേത്രത്തിന്റെ സംരക്ഷണവും വികസനവും ഒരു മതപരമായ ആവശ്യകത മാത്രമല്ല, കേരളത്തിന്റെ പൈതൃക സംരക്ഷണത്തിന്റെ ഭാഗമാണെന്നും ഈ ലക്ഷ്യം കൈവരിക്കുന്നതിന് എല്ലാ വിഭാഗങ്ങളുടെയും സഹകരണം പ്രതീക്ഷിക്കുന്നതായും രാജീവ് ചന്ദ്രശേഖർ എം.എൽ.എ അറിയിച്ചു.- ഓഫീസ് ഓഫ് രാജീവ് ചന്ദ്രശേഖർ എം.എൽ.എ