നോർത്ത് പറവൂർ: എസ്.എൻ.ഡി.പി. യോഗം നോർത്ത് പറവൂർ യൂണിയന്റെ കീഴിൽ പ്രവർത്തിക്കുന്ന വനിതാസംഘത്തിന്റെ യൂണിയൻതല പുനഃസംഘടനാ യോഗത്തിൽ പുതിയ ഭാരവാഹികളെയും എക്സിക്യൂട്ടീവ് കമ്മിറ്റിയെയും തിരഞ്ഞെടുത്തു.
പ്രസിഡന്റായി ഷൈജ മുരളീധരൻ, സെക്രട്ടറിയായി സിന്ധു ദിലീപ് കുമാർ, വൈസ് പ്രസിഡന്റായി സരിത കുഞ്ഞിത്തൈ, ജോയിന്റ് സെക്രട്ടറിയായി ശിലങ്കി ചക്കുമരശ്ശേരി, ട്രഷററായി ജിഷിത ശിവദാസ് എന്നിവരാണ് തിരഞ്ഞെടുക്കപ്പെട്ടത്. കൂടാതെ 18 അംഗ എക്സിക്യൂട്ടീവ് കമ്മിറ്റിക്കും യോഗം രൂപം നൽകി.
യൂണിയന്റെ വിവിധ ഭാഗങ്ങളിലെ പ്രവർത്തനങ്ങൾ കൂടുതൽ കാര്യക്ഷമമായും ഏകോപിതമായും മുന്നോട്ടുകൊണ്ടുപോകുന്നതിനായി യൂണിയന്റെ ഏഴ് മേഖലകളായി ഓരോ മേഖലയിലെയും പ്രവർത്തനങ്ങൾ ക്രോഡീകരിക്കുന്നതിനും ഏകോപിപ്പിക്കുന്നതിനുമായി മൂന്ന് മേഖലാ കോഡിനേറ്റർമാരെ വച്ച് തിരഞ്ഞെടുത്തു.
വനിതാസംഘത്തിന്റെ സംഘടനാ പ്രവർത്തനങ്ങൾ കൂടുതൽ ശക്തിപ്പെടുത്തുക, ശ്രീനാരായണ ഗുരുദേവന്റെ സന്ദേശങ്ങൾ സമൂഹത്തിന്റെ വിവിധ തലങ്ങളിലേക്ക് എത്തിക്കുക, വനിതാ ശാക്തീകരണത്തിനും സാമൂഹിക സേവന പ്രവർത്തനങ്ങൾക്കും കൂടുതൽ പ്രാധാന്യം നൽകുക എന്നീ ലക്ഷ്യങ്ങളോടെയാണ് പുതിയ ഭാരവാഹി സമിതി പ്രവർത്തനം ആരംഭിക്കുന്നത്.
പുതിയ ഭാരവാഹികൾക്കും എക്സിക്യൂട്ടീവ് കമ്മിറ്റി അംഗങ്ങൾക്കും വിവിധ ശാഖകളിലെ പ്രവർത്തകരും അംഗങ്ങളും ആശംസകൾ നേർന്നു.
