തിരുവല്ലം: പ്രമുഖ തൊഴിലധിഷ്ഠിത വിദ്യാഭ്യാസ സ്ഥാപനമായ നാക്ടെ – വൊക്കേഷണൽ ട്രെയിനിംഗ് സെന്ററിന്റെ (NACTE) ഇരുപതാം വാർഷിക ആഘോഷങ്ങളും ബിരുദദാന ചടങ്ങും (Convocation 2026) വിപുലമായ പരിപാടികളോടെ നടന്നു. കഴിഞ്ഞ 20 വർഷമായി വിദ്യാഭ്യാസ രംഗത്ത് മികവാർന്ന പ്രവർത്തനം കാഴ്ചവെക്കുന്ന നാക്ടെ, ഇതിനോടകം അയ്യായിരത്തിലധികം വിദ്യാർത്ഥികൾക്കാണ് വിവിധ മേഖലകളിൽ തൊഴിലധിഷ്ഠിത പരിശീലനം നൽകിയിട്ടുള്ളത്.ആഘോഷ പരിപാടികളുടെ ഔദ്യോഗിക ഉദ്ഘാടനം തിരുവനന്തപുരം ഡെപ്യൂട്ടി മേയർ ശ്രീമതി ആശാ നാഥും മുതിർന്ന അദ്ധ്യാപിക ഈശ്വരി അമ്മ ടീച്ചറും ചേർന്ന് ഭദ്രദീപം കൊളുത്തി നിർവ്വഹിച്ചു. വാർഡ് കൗൺസിലർ ശ്രീ പാച്ചല്ലൂർ ഗോപകുമാർ ചടങ്ങിൽ അധ്യക്ഷത വഹിച്ചു. തിരുവല്ലം ഗേൾസ് വി.എച്ച്.എസ്.എസ് പ്രിൻസിപ്പൽ ഡോ. ജാനു എം.എസ് പ്രഭാഷണം നടത്തി. ജെ.എസ്.എസ് (JSS TVM) ഡയറക്ടർ ശ്രീ. സതീഷ് – സൗജന്യ കോഴ്സുകളായ ബ്യൂട്ടീഷ്യൻ, കമ്പ്യൂട്ടർ ഓപ്പറേറ്റർ, ആയുർവേദ മസ്സാജർ കോഴ്സുകളുടെ പുതിയ ബാച്ചുകളുടെ ഉത്ഘാടനവും നിർവഹിച്ചു.ചടങ്ങിനോടനുബന്ധിച്ച് വിവിധ മേഖലകളിൽ വ്യക്തിമുദ്ര പതിപ്പിച്ച പ്രമുഖരെയും സ്ഥാപനങ്ങളെയും ആദരിച്ചു. ശ്രീമതി ഈശ്വരി അമ്മ ടീച്ചർ, ഹരിത കർമ്മ സേന എന്നിവർക്ക് ഡെപ്യൂട്ടി മേയർ ശ്രീമതി ആശാ നാഥും; ശ്രീ അമൽ കൃഷ്ണയ്ക്ക് ഡോ. ജാനു എം.എസും; ഉപഹാരങ്ങൾ സമർപ്പിച്ചു. ബി.എസ്.എസ് ഐടി മിഷൻ, ജെ.എസ്.എസ് തിരുവനന്തപുരം, നൂറാണി ഹോസ്പിറ്റൽ എം.ഡി, ശ്രീ പരമേശ്വരൻ, ശ്രീമതി ടി. പ്രഭ എന്നിവരും ചടങ്ങിൽ ആദരിക്കപ്പെട്ടു. കൈകൊട്ടിക്കളി മത്സര വിജയികൾക്കുള്ള സമ്മാനങ്ങളും ചടങ്ങിൽ വിതരണം ചെയ്തു.വിവിധ കോഴ്സുകൾ വിജയകരമായി പൂർത്തിയാക്കിയ വിദ്യാർത്ഥികൾക്കുള്ള സർട്ടിഫിക്കറ്റുകൾ ജെ.എസ്.എസ് വൈസ് ചെയർമാൻ ഡോ. സാബു കെ. നായർ, ഡോ. ജാനു എം എസ് , ശ്രീ സതീഷ് എന്നിവർ വിതരണം ചെയ്തു. കൗൺസിലർമാരായ ശ്രീമതി സത്യവതി, ശ്രീമതി ശൈലജ ദേവി, ശ്രീ വയൽക്കര രതീഷ്, എന്നിവർ ആശംസകൾ അറിയിച്ചു. നാക്ടെ അക്കാദമിക് കോർഡിനേറ്റർ ശ്രീ ആദർശ് എം.സി നന്ദി രേഖപ്പെടുത്തി.
