📡നെടുമ്പാശ്ശേരി അപകടം; സുഹൈലിനെതിരെ കൊലക്കുറ്റത്തിന് കേസെടുക്കണമെന്ന് ദേവികയുടെ കുടുംബം, പ്രതിയെ കുട്ടികളുടെ ജയില്‍ പാര്‍പ്പിച്ചതില്‍ സംശയം

കൊച്ചി: നെടുമ്പാശ്ശേരി മിനി കൂപ്പർ അപകടത്തില്‍ പ്രതി സുഹൈലിനെതിരെ കൊലക്കുറ്റത്തിന് കേസ് എടുക്കണമെന്ന് മരിച്ച ദേവികയുടെ കുടുംബം.ഞങ്ങള്‍ക്ക് ഉണ്ടായത് മറ്റാർക്കും ഇനി ഉണ്ടാകരുതെന്ന് ദേവികയുടെ കുടുംബം പറഞ്ഞു. വളരെ വൈകാരികമായാണ് ദേവികയുടെ അമ്മ മാധ്യമങ്ങളോട് പ്രതികരിച്ചത്. വീടിന്റെ വിളക്കാണ് നഷ്ടമായത്. മകളെ പഠിപ്പിച്ചത് സ്ഥലം വിറ്റുകൊണ്ടായിരുന്നു. കുടുംബത്തിന്റെ ഏക ആശ്രയമായിരുന്നു ദേവിക. പുറത്തേക്ക് പോകാനിരിക്കെയാണ് അപകടം ഉണ്ടായത്. മൂന്ന് കുട്ടികളും കുടുംബത്തിന്റെ ഏക ആശ്രയമാണെന്നും സംഭവത്തില്‍ സുഹൈലിനെതിരെ കൊലക്കുറ്റത്തിന് കേസ് എടുക്കണമെന്നും കുടുംബം പറഞ്ഞു.

ദേവികയുടെ മൃതദേഹം വെക്കാനുള്ള സ്ഥലം പോലും വീട്ടില്‍ ഉണ്ടായിരുന്നില്ല. ദേവികയില്‍ ആയിരുന്നു പ്രതീക്ഷ. സുഹൈല്‍ കരുതി കൂട്ടി ഇടിച്ചത് ആണോ എന്നും സംശയമുണ്ട്. കുടുംബത്തിന്റെ പ്രതീക്ഷയായിരുന്നു. പഠനത്തില്‍ മികച്ചതായിരുന്നു. എല്ലാത്തിലും മികവ് തെളിയിച്ചു. സർക്കാരും പൊലീസും സഹായിക്കുമെന്ന് പ്രതീക്ഷിക്കുകയാണ്. സർക്കാർ ഒപ്പം നില്‍ക്കുമെന്ന് പ്രതീക്ഷിക്കുന്നു. കൂടുതല്‍ വകുപ്പുകള്‍ സുഹൈലിനെതിരെ ചുമത്തണം. സുഹൈല്‍ വരുത്തി വച്ച അപകടമാണിത്. കേസിന്റെ ഏതറ്റംവരെയും പോകും. സുഹൈലിന് പരമാവധി ശിക്ഷ ലഭിക്കണം. ദേവികയുടെ അനിയൻ ചെറിയ പ്രായമാണ്. പ്രതീക്ഷ ദേവികയില്‍ ആയിരുന്നുവെന്നും ദേവികയുടെ അമ്മയുടെ സഹോദരൻ സന്ദീപ് പറഞ്ഞു.

സുഹൈല്‍ സജീവിനെ കുട്ടികളെ പാർപ്പിക്കുന്ന ജയിലില്‍ ആണ് റിമാൻഡ് ചെയ്തിരിക്കുന്നതെന്ന് അറിഞ്ഞു. കുട്ടികളുടെ ജയിലില്‍ ആണോ കൈകാര്യം ചെയ്യേണ്ടത്. ഇത്ര വലിയ കുറ്റകൃത്യം ചെയ്തയാളെ കുട്ടികളുടെ ജയിലില്‍ ആണോ ഇടുക. കുടുംബത്തിന്റെ ഇടപെടല്‍ ആണോ എന്ന് സംശയമുണ്ട്. കുടുംബം ഇടപെട്ട് സംരക്ഷണം ഒരുക്കുകയാണ്. അതിനാണ് കുട്ടികളുടെ ജയിലില്‍ പാർപ്പിച്ചതെന്നും ദേവികയ്ക്ക് നീതി കിട്ടണമെന്നും ദേവികയുടെ അച്ഛൻ സന്തോഷ്‌ പറഞ്ഞു.