ഡല്‍ഹി: യമുനയിലെ ജലനിരപ്പ് വീണ്ടും ഉയരുന്നുവെന്ന് റിപ്പോര്‍ട്ട്. നേരത്തെ അപകടകരമായ നിലയില്‍ ഉയര്‍ന്ന ജലനിരപ്പ് താഴ്ന്നു തുടങ്ങിയിരുന്നു. ഇന്ന് ഉച്ചയ്ക്ക് 1 മണിക്ക് 205.84 മീറ്ററാണ് ജലനിരപ്പ് രേഖപ്പെടുത്തിയത്. ഇത് 12:00 ന് രേഖപ്പെടുത്തിയ 205.80 മീറ്ററില്‍ നിന്ന് അല്‍പം ഉയര്‍ന്നതാണ്.
യമുന നദിയിലെ ജലനിരപ്പ് വര്‍ധിക്കുന്നത് താത്കാലികമാണെന്നും പ്രാദേശിക സംഭാവനകള്‍ മൂലമാണ് ഇപ്പോള്‍ ജലനിരപ്പ് ഉയരുന്നതെന്നും ഉദ്യോഗസ്ഥര്‍ പറഞ്ഞു. ഇന്ന് വൈകുന്നേരം വരെ ജലനിരപ്പ് ഉയര്‍ന്ന് പിന്നീട് കുറയുമെന്നാണ് പ്രതീക്ഷിക്കുന്നത്.
യമുന ബസാര്‍, ഐടിഒ ഉള്‍പ്പെടെ നഗരത്തിന്റെ പല ഭാഗങ്ങളിലും വെള്ളക്കെട്ട് സ്ഥിതി തുടരുകയാണ്. ഇന്ത്യന്‍ മെറ്റീരിയോളജിക്കല്‍ ഡിപ്പാര്‍ട്ട്മെന്റ് (ഐഎംഡി) പറയുന്നതനുസരിച്ച്, തിങ്കളാഴ്ച ദേശീയ തലസ്ഥാനത്ത് നേരിയ മഴയ്ക്ക് സാധ്യതയുണ്ട്.
പ്രളയത്തില്‍ ആധാര്‍ കാര്‍ഡുകളും മറ്റ് തിരിച്ചറിയല്‍ പേപ്പറുകളും ഉള്‍പ്പെടെയുള്ള പ്രധാന രേഖകള്‍ നഷ്ടപ്പെട്ട ആളുകളെ സഹായിക്കാന്‍ ദുരിതബാധിതരായ ഓരോ കുടുംബത്തിനും 10,000 രൂപ ധനസഹായവും പ്രത്യേക ക്യാമ്പുകളും ഡല്‍ഹി മുഖ്യമന്ത്രി കെജ്രിവാള്‍ ഞായറാഴ്ച പ്രഖ്യാപിച്ചിരുന്നു. നഗരത്തിലെ വെള്ളപ്പൊക്ക ബാധിത പ്രദേശങ്ങളിലെ എല്ലാ സര്‍ക്കാര്‍, സ്വകാര്യ സ്‌കൂളുകള്‍ക്കും ചൊവ്വാഴ്ച വരെ അവധിയായിരിക്കുമെന്ന് ഡല്‍ഹി സര്‍ക്കാര്‍ ഞായറാഴ്ച അറിയിച്ചു.
അതെസമയം തലസ്ഥാനത്ത് 27 ഡെങ്കിപ്പനി കേസുകള്‍ സ്ഥിരീകരിച്ചതായും റിപ്പോര്‍ട്ടുണ്ട്
