കൊച്ചി: യാത്രക്കാരുടെ എണ്ണം 10 ലക്ഷം കടന്ന് കൊച്ചി വാട്ടർ മെട്രോ. മലപ്പുറം മഞ്ചേരി സ്വദേശിയായ ആറാം ക്ലാസുകാരി സന്‍ഹ ഫാത്തിമയാണ് പത്ത് ലക്ഷം തികച്ച യാത്രക്കാരി. കുടുംബത്തോടൊപ്പം ഹൈ കോര്‍ട്ട് ജംഗ്ഷന്‍ ടെര്‍മിനലില്‍ നിന്ന് വൈപ്പിന്‍ വാട്ടര്‍ മെട്രോ ടെര്‍മിനലിലേക്ക് യാത്ര ചെയ്യാന്‍ എത്തിയതാണ് സൻഹ.
സര്‍വീസ് തുടങ്ങി 6 മാസം പൂര്‍ത്തിയാകുന്നതിനു മുന്‍പ് ആണ് വാട്ടര്‍ മെട്രോ പത്ത് ലക്ഷം എന്ന നേട്ടം കൈവരിച്ചത്. 10 ലക്ഷം തികയ്ക്കുന്ന സഞ്ചാരിക്ക് വാട്ടര്‍ മെട്രോ സര്‍പ്രൈസ് സമ്മാനവും ഒരുക്കിയിരുന്നു. കൈവരിക്കാന്‍ കഴിഞ്ഞത് അതുല്യ നേട്ടമെന്ന് മെട്രോ സി ഒ ഒ സാജന്‍ പി ജോണ്‍ പറഞ്ഞു. കൂടുതല്‍ ഇടങ്ങളിലേക്ക് സര്‍വീസ് ആരംഭിക്കുമ്പോള്‍ ഇനിയും യാത്രക്കാരുടെ എണ്ണത്തില്‍ വര്‍ദ്ധന ഉണ്ടാകുമെന്നും അദ്ദേഹം കൂട്ടിച്ചേർത്തു.
