ഡല്‍ഹി: ജമ്മു കശ്മീരിലെ കത്വ മുതല്‍ പഞ്ചാബ് വരെ ലോക്കോ പൈലറ്റില്ലാതെ കിലോമീറ്ററുകളോളം ട്രെയിൻ ഓടി. ഒഴിവായത് വൻ ദുരന്തം.ജമ്മു കശ്മീരിലെ കത്വാ സ്റ്റേഷനില്‍ നിർത്തിയിട്ടിരുന്ന ചരക്കു ട്രെയിനാണ് തനിയെ ഓടിയത്. സംഭവത്തില്‍ റെയില്‍വേ അന്വേഷണം ആരംഭിച്ചു.
കത്വാ സ്റ്റേഷനില്‍ നിർത്തിയിട്ടിരുന്ന ട്രെയിൻ അപ്രതീക്ഷിതമായി തനിയേ ഓടുകയായിരുന്നുവെന്നാണ് റിപ്പോർട്ട്. പഠാൻകോട്ട് ഭാഗത്തേക്കുള്ള ദിശയില്‍ നിർത്തിയിട്ടിരുന്ന ട്രെയിൻ, മുന്നിലെ ചെറിയ ഇറക്കത്തിലൂടെ തനിയേ ഉരുണ്ടു നീങ്ങുകയായിരുന്നു.
ഒരു ഘട്ടത്തില്‍ മണിക്കൂറില്‍ 100 കിലോമീറ്റർ വരെ വേഗതയില്‍ ഈ ട്രെയിൻ സഞ്ചരിച്ചതായാണ് വിവരം. ഒടുവില്‍ റെയില്‍വേ അധികൃതരുടെ തീവ്ര ശ്രമത്തിനൊടുവില്‍ പഞ്ചാബിലെ മുകെരിയാനു സമീപം ഉച്ചി ബാസിയില്‍ വച്ചാണ് ട്രെയിൻ തടഞ്ഞു നിർത്താനായത്.
ഇതിനിടെ, ട്രെയിൻ ലോക്കോ പൈലറ്റില്ലാതെ ഓടുന്നതിന്റെ ദൃശ്യങ്ങള്‍ സമൂഹമാധ്യമങ്ങളിലും പ്രചരിക്കുന്നുണ്ട്. ഒരു റെയില്‍വേ സ്റ്റേഷനിലൂടെ ട്രെയിൻ അതിവേഗം പോകുന്ന ദൃശ്യമാണ് പ്രചരിക്കുന്നത്.
