കോട്ടയം> കുമാരനല്ലൂരിരിനടുത്ത് നായകളുടെ കാവലില്‍ വൻതോതില്‍ ലഹരി വില്പന നടത്തിവന്ന കേന്ദ്രത്തില്‍ നടത്തിയ പരിശോധനയില്‍ 17.8 കിലോ കഞ്ചാവ് പിടിച്ചു. പ്രതി അക്കരെ നട്ടാശേരി സ്വദേശി റോബിൻ ജോര്‍ജ് പൊലീസിനെ വെട്ടിച്ച്‌ രക്ഷപെട്ടു. വലിയാലിൻചുവട്ടില്‍ വാടകയ്ക്ക് എടുത്ത വീട്ടിലായിരുന്നു കഞ്ചാവ് വില്പന. ഞായര്‍ രാത്രി പത്തരയോടെയാണ് പരിശോധന ആരംഭിച്ചത്. നായകളെ അഴിച്ച്‌ വിട്ടിരുന്നതിനാല്‍ പൊലീസിന് ആദ്യം വീടിനകത്ത് കയറാനായില്ല. തുടര്‍ന്ന് ഡോഗ് സ്ക്വാഡിനെ വിളിച്ചുവരുത്തി നായകളെ കെട്ടിയ ശേഷമാണ് അകത്ത് കയറിയത്. അതിനിടെ പ്രതി ഓടി രക്ഷപെട്ടു.
നായകളെ സംരക്ഷിക്കുകയും പരിശീലനം നല്‍കുകയും ചെയ്യുന്ന ‘ഡെല്‍റ്റ കെ 9’ എന്ന പേരില്‍ നടത്തിവന്ന സ്ഥാപനത്തിന്റെ മറവിലായിരുന്നു ലഹരി ഇടപാട്. ഒന്നര വര്‍ഷം മുമ്ബാണ് ഇയാള്‍ വീട് വാടകയ്ക്ക് എടുത്തത്. ദിവസം ആയിരം രൂപ നിരക്കില്‍ നായകളുടെ സംരക്ഷണവും ഇയാള്‍ ഏറ്റെടുത്തിരുന്നു. വിദേശയിനങ്ങളടക്കം 13 നായകളാണ് ഇവിടെ ഉണ്ടായിരുന്നത്. ഇവയില്‍ രണ്ടെണ്ണം പ്രതിയുടെതാണെന്നും മറ്റുള്ളവയെ സംരക്ഷണത്തിന് എത്തിച്ചതാകാമെന്നും നാട്ടുകാര്‍ പറഞ്ഞു. ഇയാളുടെ പ്രവര്‍ത്തനത്തില്‍ സംശയം തോന്നിയ പൊലീസ് കോടതിയില്‍ നിന്ന് സേര്‍ച്ച്‌ വാറണ്ടുമായാണ് എത്തിയത്.
കാക്കി ധരിച്ചവരെ കണ്ടാല്‍ ആക്രമിക്കാൻ നായകള്‍ക്ക് റോബിൻ പരിശീലനം നല്‍കിയതായി ജില്ലാ പൊലീസ് മേധാവി കെ കാര്‍ത്തിക് മാധ്യമ പ്രവര്‍ത്തകരോട് പറഞ്ഞു. ബിഎസ്‌എഫില്‍ നിന്ന് വിരമിച്ച ഒരു ഡോഗ് ട്രെയിനറെ ഇയാള്‍ സമീപിച്ചിരുന്നു. കാക്കി ഇട്ടവരെ ആക്രമിക്കാൻ എങ്ങനെ നായകളെ പഠിപ്പിക്കാം എന്ന് ചോദിച്ചതോടെ സംശയം തോന്നി അദ്ദേഹം ഒഴിവാക്കുകയായിരുന്നു. പ്രതിയെ പിടിക്കാനായി കോട്ടയം ഡിവൈഎസ്പിയുടെ നേതൃത്വത്തില്‍ പ്രത്യേക അന്വേഷണസംഘം രൂപീകരിക്കുമെന്നും ജില്ലാ പൊലീസ് മേധാവി പറഞ്ഞു.
