പറവൂർ സുകുമാരൻ മാസ്റ്റർ അനുസ്മരണവും കാഥിക സുരഭി അവാർഡ് സമർപ്പണവും കഥാപ്രസംഗ കലാകാരന്മാരെ ആദരിക്കലും 2025 മെയ് 7-ാം തീയതി ബുധനാഴ്ച വൈകിട്ട് 4 മണിക്ക് നന്ത്യാട്ടുകുന്നം ക്ഷേമോദയം ഓഡിറ്റോറിയത്തിൽ വച്ച് നടക്കും. പറവൂരിന്റെ സാംസ്കാരിക മണ്ഡലത്തിൽ നിറസാന്നിധ്യമായിരുന്ന പറവൂർ സുകുമാരൻ മാസ്റ്ററുടെ സ്മരണയ്ക്കായി പറവൂർ സുകുമാരൻ മാസ്റ്റർ സ്മാരക ട്രസ്റ്റ് ഏർപ്പെടുത്തിയിട്ടുള്ള കാഥിക സുരഭി അവാർഡ് ആലപ്പി രമണന് നന്ത്യാട്ടുകുന്നം ക്ഷേമോദയം ഓഡിറ്റോറിയത്തിൽ വച്ച് നടക്കുന്ന സാംസ്കാരിക സമ്മേളനത്തിൽ വച്ച് നൽകും. ട്രസ്റ്റ് ചെയർമാൻ പ്രദീപ് തോപ്പിലിന്റെ അധ്യക്ഷതയിൽ ചേരുന്ന യോഗം കഥാകൃത്തും പുരോഗമന കലാസാഹിത്യസംഘം സംസ്ഥാന വൈസ് പ്രസിഡന്റുമായ ശ്രീ അശോകൻ ചരിവിൽ ഉദ്ഘാടനം ചെയ്യും. എൻ എം പിയേഴ്സൺ അനുസ്മരണ പ്രഭാഷണം നടത്തും.മുഖ്യ അതിഥിയായി ശ്രീ ബിനു അടിമാലി പങ്കെടുക്കും. ചടങ്ങിൽ വസന്തകുമാർ സാംബശിവൻ, ഇടക്കൊച്ചി സലിംകുമാർ, പുളിമാത്ത് ശ്രീകുമാർ, രാജീവ് നരിക്കൽ,വിനോദ് കെടാമംഗലം, പി കെ രമാദേവി, ബൈജു സുകുമാരൻ ,സൂരജ് സത്യൻ, വി എൻ ഉണ്ണിരാജ് എന്നിവർ പങ്കെടുക്കും.
കേരള സംഗീത നാടക അക്കാദമി അവാർഡ് കരസ്ഥമാക്കിയ ഞെക്കാട് ശശി, കൈതാരം വിനോദ് കുമാർ എന്നിവരെ ആദരിക്കും. തുടർന്ന്, ആലപ്പി രമണൻ അവതരിപ്പിക്കുന്ന ചങ്ങമ്പുഴ കവിതകൾ എന്ന കഥാപ്രസംഗവും അവതരിപ്പിക്കും. പറവൂർ സുകുമാരൻ സ്മാരക ട്രസ്റ്റും നന്ത്യാട്ടുകുന്നം കലാവേദി ഗ്രന്ഥശാലയും നന്ത്യാട്ടുകുന്നം നാടക അരങ്ങും സംയുക്തമായാണ് പരിപാടി സംഘടിപ്പിച്ചിട്ടുള്ളത്.
