ചന്ദ്രയാൻ 3 ന്റെ പ്രൊപ്പല്‍ഷൻ മോഡ്യൂളിനെ ചന്ദ്രന്റെ ഭ്രമണപഥത്തില്‍ നിന്നും തിരികെ ഭൂമിയുടെ ആകര്‍ഷണ വലയത്തിലേക്ക് എത്തിച്ചതായി ഐഎസ്‌ആര്‍ഒ (ISRO) അറിയിച്ചു.ഈ നേട്ടം ഐഎസ്‌ആര്‍ഒയുടെ ഭാവി പദ്ധതികള്‍ക്ക് കരുത്ത് പകരുന്നതാണെന്നാണ് വിലയിരുത്തല്‍. ആഗസ്റ്റ് ഒന്നിനാണ് ലാൻഡറിനെയും വഹിച്ച്‌ പ്രൊപ്പഷൻ മോഡ്യൂള്‍ ഭൂമിയുടെ ഭ്രമണപഥത്തില്‍ നിന്നും ചന്ദ്രനിലേക്ക് യാത്ര തിരിച്ചത്. ആഗസ്റ്റ് അഞ്ചിന് മൊഡ്യൂള്‍ ചന്ദ്രന്റെ ഭ്രമണപഥത്തിലേക്ക് വിജയകരമായി പ്രവേശിക്കുകയും ചെയ്തു.
ഭൂമിയുടെ ഭ്രമണപഥത്തിലേക്ക് തിരികെ എത്തുമ്ബോള്‍ 100 കിലോഗ്രാമില്‍ അധികം ഇന്ധനമാണ് മോഡ്യൂളില്‍ അവശേഷിക്കുന്നത്. ചന്ദ്രയാൻ -2 ന്റെ പരാജയ പാഠങ്ങള്‍ ഉള്‍ക്കൊണ്ടു കൊണ്ടായിരുന്നു ചന്ദ്രയാൻ -3 ന്റെ പദ്ധതികള്‍. ഭൂമിയെ വാസ യോഗ്യമാക്കുന്ന പ്രത്യേകളെക്കുറിച്ച്‌ ഉള്ള നിരീക്ഷണങ്ങള്‍ക്കും ജീവന് സാധ്യതയുള്ള മറ്റ് ഗ്രഹങ്ങള്‍ കണ്ടെത്തുന്നതിനും വേണ്ടി സ്‌പെക്‌ട്രോ പോളറിനറി ഓഫ് ഹാബിറ്റബിള്‍ പ്ലാനറ്റ് എര്‍ത്ത് (SHAPE) എന്ന ഒരു ഉപകരണം മാത്രമാണ് പ്രൊപ്പല്‍ഷൻ മോഡ്യൂളില്‍ ഉണ്ടായിരുന്നത്.
ആഗസ്റ്റ് 17 നാണ് പ്രൊപ്പല്‍ഷൻ മൊഡ്യൂള്‍ ലാൻഡറില്‍ നിന്നും വേര്‍പെട്ടത്. അടുത്ത ആറു മാസത്തേക്ക് കൂടി മോഡ്യൂള്‍ ചന്ദ്രനെ വലം വയ്ക്കുമെന്നാണ് പ്രതീക്ഷിച്ചിരുന്നത്. ചന്ദ്രന്റെ ഉപരിതലത്തില്‍ നിന്നും 100 കി മീ അകലെയുള്ള ഭ്രമണപഥത്തില്‍ വരെ ലാൻഡര്‍ മോഡ്യൂളിനെ എത്തിക്കാനും ശേഷം അതില്‍ നിന്നു വേര്‍പെടുക എന്നതുമാണ് പ്രൊപ്പഷൻ മൊഡ്യൂളിന് ഉണ്ടായിരുന്ന പ്രധാന ദൗത്യം എന്ന് ഐഎസ്‌ആര്‍ഒ വൃത്തങ്ങള്‍ സൂചിപ്പിക്കുന്നു.
LMV3 (Launch Vehicle Mark 3) ഉപയോഗിച്ചുള്ള ചന്ദ്രയാൻ 3 ന്റെ വിക്ഷേപണം വിജയിച്ചതിനെത്തുടര്‍ന്ന് ഒരു മാസത്തിന് ശേഷവും മൊഡ്യൂളില്‍ 100 കിലോഗ്രാമില്‍ അധികം ഇന്ധനം അവശേഷിച്ചുവെന്നും മൂന്ന് മാസത്തോളം SHAPE ഉപയോഗിച്ച്‌ ഭൂമിയെ നിരീക്ഷിക്കാനാണ് ആദ്യം പദ്ധതിയിട്ടത് എന്നും ഐഎസ്‌ആര്‍ഒ കൂട്ടിച്ചേര്‍ത്തു. ഇക്കാര്യങ്ങള്‍ ആദ്യം പദ്ധതിയില്‍ ഇല്ലായിരുന്നുവെന്നും എന്നാല്‍ ഓരോ ഘട്ടത്തിലുമുള്ള ചന്ദ്രയാൻ -3 ന്റെ വിജയകരമായ ദൗത്യം പ്രൊപ്പഷൻ മോഡ്യൂളിനെ തിരികെ എത്തിക്കാൻ സഹായിച്ചുവെന്നും പ്രൊജക്റ്റ്‌ ഡയറക്ടര്‍ വീരമുത്തുവേല്‍ പറഞ്ഞു.
മൊഡ്യൂളിനെ തിരികെ എത്തിക്കാനുള്ള പദ്ധതികള്‍ക്ക് ഒക്ടോബറിലാണ് ഐഎസ്‌ആര്‍ഒ തുടക്കമിട്ടത്. ഒക്ടോബര്‍ 9 നാണ് ആദ്യമായി മോഡ്യൂളിന്റെ ഭ്രമണ പാത ക്രമീകരിച്ചത്. ചന്ദ്രനില്‍ നിന്നും 150 കി മീ ഉയരത്തിലായിരുന്ന മോഡ്യൂളിനെ 5112 കി മീ ഉയരത്തിലേക്ക് മാറ്റി. രണ്ടാമത്തെ ഭ്രമണ പാത ക്രമീകരണത്തിലൂടെ ഭൂമിയെ ചുറ്റുന്ന 1.8 ലക്ഷം കി മീ ×3.8 ലക്ഷം കി മീ ഭ്രമണപഥത്തിലേക്ക് മൊഡ്യൂളിനെ എത്തിക്കാൻ തീരുമാനിച്ചു. ഒക്ടോബര്‍ 13 ന് ഇത് വിജയകരമായി നടപ്പാക്കുകയും ചെയ്തു.
നിലവില്‍ പ്രൊപ്പഷൻ മോഡ്യൂള്‍ ഭൂമിയെ ചുറ്റിക്കൊണ്ടിരിക്കുകയാണ്.13 ദിവസത്തോളം മോഡ്യൂള്‍ ഈ ഭ്രമണപഥത്തില്‍ തുടരും. ഭൂമിയുടെ മറ്റ് സാറ്റ്ലൈറ്റുകള്‍ ഒന്നും ഇതിന് തടസ്സമാകില്ല എന്ന് ഐഎസ്‌ആര്‍ഒ വ്യക്തമാക്കി. മൊഡ്യൂളിനെ തിരികെ എത്തിക്കുന്നതിലൂടെ ഭാവിയില്‍ ചന്ദ്രനില്‍ നിന്ന് പേടകങ്ങള്‍ തിരികെ ഭൂമിയുടെ ഭ്രമണപഥത്തില്‍ എത്തിക്കാനുള്ള ദൗത്യങ്ങള്‍ക്ക് ആവശ്യമായ വിവരങ്ങള്‍ ലഭ്യമാകും എന്നാണ് പ്രതീക്ഷിക്കുന്നത്.
