ആദ്ധ്യാത്മിക ചരിത്രം :- “ശ്രീവല്ലഭവൻ “കഥകളി പ്രിയൻ….” ചെമ്പകശ്ശേരി ചന്ദ്രബാബു “

പത്തനംതിട്ട: കഥകളി ആസ്വദിച്ച് ഉറങ്ങുകയെന്നത് ഭഗവാൻ ശ്രീവല്ലഭൻ്റെ ഏറ്റവും വലിയ ആഗ്രഹമാണ്. അല്ലെങ്കിൽ ദേവനു വേണ്ടി മാത്രം എന്നും രാത്രി കഥകളി അവതരിപ്പിക്കുന്ന ക്ഷേത്രമാണ് കേരളത്തിലെ പുരാതനമായ പത്തനംതിട്ടയിലെ തിരുവല്ല ശ്രീവല്ലഭ ക്ഷേത്രം. ഭക്തർക്ക് മാത്രമല്ലാതെ ഭഗവാന് ദർശിക്കുന്നതിന് വേണ്ടി ഒരു കലാസൃഷ്ടി അരങ്ങേറുന്ന ക്ഷേത്രമെന്ന നിലയിലും ഇവിടെ പ്രസക്തിയേറുന്നു. കഥകളി നടക്കുന്ന കിഴക്കേ ഗോപുരത്തിൽ തെക്കുവശത്തായി ഒരു പീഠം അലംങ്കരിച്ച് ഭഗവാന്കഥകളി കാണുന്നതിന് പ്രത്യേക സൗകര്യം ഒരുക്കുന്നു. പീഠത്തിൽ പട്ട് വിരിച്ച് ഇലയിൽ നെല്ല്, അരി, നാളികേരം എന്നിവയും സജ്ജീകരിച്ച് നിലവിളക്കും വയ്ക്കും.ഈ പീഠത്തിലിരുന്നാണത്രെ ദേവൻ കഥകളി തൃപ്തിയോടെ കാണുന്നതന്നാണ് വിശ്വാസം.അസുര വാദ്യത്തിൻ്റെ അകമ്പടിയോടെ അവതരിപ്പിക്കുന്ന ദേവകലയാണ് കഥകളി. അത് ഭഗവാൻ്റെ മുൻപിൽ അവതരിപ്പിക്കുകയെന്നത് ഏതൊരു കലാകാരൻ്റേയും അനുഗ്രഹമാണ്. അതു കൊണ്ടാണ് ദൃശ്യകലകളുടെ സമ്പൂർണ്ണ സാക്ഷാത്കാരമായ കഥകളിയുടെ സവിശേഷമായ സൗന്ദര്യം ആസ്വദിക്കുവാൻ ശ്രി വല്ലഭ സന്നിധിയിൽ ഭക്തർ എത്തണമെന്ന് പറയുന്നത്. കഥകളിയുടെ തുടക്കകാലം മുതൽ ശ്രീവല്ലഭ ക്ഷേത്രത്തിൽ അരങ്ങേറിയിരുന്നതായാണ് ചരിത്രം. പിന്നീട് കഥകളിക്കു പ്രത്യേക പ്രാധാന്യം ലഭിക്കാൻ ഒരു കാരണവുമുണ്ടായി.വിഷ്ണുഭക്തനായ വില്യ മംഗലത്ത് സ്വാമിയാർ അതിരാവിലെ ക്ഷേത്രക്കുളത്തിൽ കുളി കഴിഞ്ഞ് നിർമ്മാല്യ ദർശനത്തിനു സോപാനത്തിന് മുൻപിലെത്തിയപ്പോൾ ശ്രീകോവിലിനുള്ളിൽ വിഷ്ണു ചൈതന്യം കണ്ടില്ല. ഭഗവാനെ നേരിട്ട് ദർശിക്കുന്നതിന് വൈഭവമുണ്ടായിരുന്ന സ്വാമിയർ വലിയമ്പലത്തിലും നാലമ്പലത്തിലും തിടപ്പള്ളിയിലും തിരഞ്ഞു.ഒടുവിൽ ദേഹി ദർശനം ശൗര്യേ എന്നു പ്രാർഥിച്ച് കൊണ്ട് കിഴക്കേ ഗോപുരത്തിൽ നടക്കുന്ന കഥകളി കാണാം എന്ന് വിചാരിച്ച് അവിടെയെത്തിയപ്പോൾ ഒരു ഉണ്ണി നമ്പൂതിരി കഥകളി ആസ്വദിക്കുന്നത് കണ്ടു. ഭഗവാനായിരുന്നു അത്. ഇരുവർക്കും മനസ്സിലായി. വില്യമംഗലം നമ്മെ ഒന്നു കഥകളി കാണാനും സമ്മതിക്കില്ല അല്ലേയെന്നു ചോദിച്ചു. സമസ്താപരാധം എന്നു പറഞ്ഞ് സ്വാമിയാർ നമസ്കരിച്ചു.ഇതോടെ കഥകളി ക്ഷേത്രങ്ങളിലെ ഒരു പ്രധാന വഴിപാടായി ഭക്തർ ഇന്നും നടത്തുന്നു. വർഷങ്ങളായി എല്ലാ ദിവസവും രാത്രി 9.30 ന് ക്ഷേത്രത്തിൽ കഥകളി നടക്കാറുണ്ട്. കഥകളിക്ക് പ്രാധാന്യം ലഭിച്ചതോടെ കഥകളി കലയ്ക്ക് തിരുവല്ല പ്രശസ്തി നേടി.ഇപ്പോൾ രണ്ട് കഥകളി സംഘങ്ങളും അൻപതോളം കലാകാരന്മാരുമുണ്ട്. കേരളത്തിലെ പേര് കേട്ട എല്ലാ കഥകളി കലാകാരന്മാരും ശ്രീവല്ലഭനു മുൻപിൽ വേഷമിട്ടവരാണ്.