തൃശൂർ: അതിരപ്പിള്ളി വാഴച്ചാലില്‍ കാട്ടാന ആക്രമണത്തിൽ വനം വാച്ചർ കൊല്ലപ്പെട്ടു. കൊല്ലത്തിരുമേട് ഫോറസ്റ്റ് സ്റ്റേഷനിലെ വാച്ചര്‍ ഇരിമ്പന്‍ കുമാരന് (55) ആണ് കൊല്ലപ്പെട്ടത്. ഒപ്പമുണ്ടായിരുന്ന വാച്ചറായ സുനിലിനെ പരിക്കുകളോടെ ആശുപത്രിയിൽ പ്രവേശിപ്പിച്ചു. ഇന്നലെ വൈകിട്ട് നാലുമണിയോടെ വാഴച്ചാൽ വനം ഡിവിഷനായ ഊളശ്ശേരി, കരടിപ്പാറയിൽ വെച്ചായിരുന്നു കാട്ടാന ആക്രമണം നടന്നത്.
ആനമല റോഡില്‍ നിന്ന് 10 കിലോമീറ്റർ അകലെ ഉൾവനത്തിലായിരുന്നു സംഭവം. കാട്ടിൽ പരിശോധനയ്ക്ക് പോയ കുമാരനെ ആന തട്ടിത്തെറിപ്പിക്കുകയായിരുന്നു. തുടർന്ന് വലിയ കുഴിയിൽ വീണ് കുമാരന് പരിക്കേറ്റു. ഗുരുതര പരിക്കുകളോടെ കുമാരനെ ചാലക്കുടി താലൂക്ക് ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. ഇവരുടെ ഒപ്പമുണ്ടായിരുന്ന പ്രദേശവാസിയായ സനല്‍ ഓടി രക്ഷപ്പെട്ടു.
