സുല്‍ത്താൻ ബത്തേരി : 46.65 ഗ്രാം എം.ഡി.എം.എയുമായി യുവാവിനെ പിടികൂടി. ക്രിസ്തുമസ്- പുതുവര്‍ഷാഘോഷത്തോടനുബന്ധിച്ച്‌ ജില്ലാ പോലീസ് മേധാവി ശ്രീ.പദം സിങ് ഐ.പി.എസിന്റെ നിര്‍ദേശപ്രകാരം നര്‍കോട്ടിക് സെല്‍ ഡിവൈ.എസ്.പി എൻ.ഒ. സിബി, ബത്തേരി സബ് ഡിവിഷൻ ഡിവൈ.എസ്.പി അബ്ദുല്‍ ഷരീഫ് എന്നിവരുടെ നേതൃത്വത്തില്‍ ജില്ലാ അതിര്‍ത്തികളിലെ പോലീസ് പരിശോധന കര്‍ശനമാക്കി.
മുത്തങ്ങ പോലീസ് ചെക്ക് പോസ്റ്റിനു സമീപം വച്ച്‌ നടത്തിയ പരിശോധനയില്‍ 46.65 ഗ്രാം എം.ഡി.എം.എയുമായി കോഴിക്കോട് സ്വദേശിയായ യുവാവിനെ പിടികൂടി. കര്‍ണാടകയില്‍ നിന്നും കേരളത്തിലേക്ക് വരികയായിരുന്ന ബസില്‍ നടത്തിയ പരിശോധനയിലാണ് എരഞ്ഞിക്കല്‍, കളത്തില്‍ വീട്ടില്‍ കെ. അഭി(28)യെ ബത്തേരി പോലീസും ജില്ലാ ലഹരി വിരുദ്ധ സ്ക്വാഡും ചേര്‍ന്ന് പിടികൂടിയത്.
ബത്തേരി പോലീസ് സ്റ്റേഷൻ സബ് ഇൻസ്‌പെക്ടര്‍ കെ വി. ശശികുമാര്‍, എസ്.സി.പി.ഒമാരായ ഗോപാലകൃഷ്ണൻ, അരുണ്‍ജിത്ത്, ശിവദാസൻ, സി.പി.ഓ മിഥിൻ തുടങ്ങിയവരും ലഹരിവിരുദ്ധ സേനയിലെ ഉദ്യോഗസ്ഥരും ചേര്‍ന്നാണ് ഇയാളെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
