ഡെറാഡൂൺ: ഉത്തരകാശിയിൽ സിൽക്യാര തുരങ്കത്തിൽ കുടുങ്ങിയവരെ രക്ഷിക്കാനുളള രക്ഷാപ്രവർത്തനം അവസാനഘട്ടത്തിലേക്ക്. രാവിലെ പതിനൊന്ന് മണിക്ക് ഡ്രില്ലിങ് ആരംഭിക്കും. ഡ്രില്ലിങ് യന്ത്രം ഉറപ്പിച്ചുവച്ചിരിക്കുന്ന കോൺക്രീറ്റ് അടിത്തറ വീണ്ടും സജ്ജമാക്കിയിട്ടുണ്ട്. തൊഴിലാളികൾ തുരങ്കത്തിൽ കുടുങ്ങികിടക്കാൻ തുടങ്ങിയിട്ട് ഇന്ന് 13-ാം ദിവസമാണ്.
തുരങ്കത്തിനുള്ളിൽ കുടുങ്ങിയ 41 തൊഴിലാളികളെ പുറത്തെടുക്കാനുള്ള രക്ഷാപ്രവർത്തനം ഡ്രില്ലിംഗ് മെഷീനിലെ തകരാർ കാരണം വ്യാഴാഴ്ച താൽക്കാലികമായി നിർത്തിവച്ചിരുന്നു. ഡ്രില്ലിങ് ഉറപ്പിച്ച് നിർത്തിയിരുന്ന കോൺക്രീറ്റ് ഭാഗം യന്ത്രം പ്രവർത്തിക്കുമ്പോഴുളള പ്രകമ്പനത്തിൽ തകർന്നതാണ് രക്ഷാദൗത്യത്തിൽ പ്രതിസന്ധി സൃഷ്ടിച്ചത്.
