എറണാകുളം: പെരുമ്പാവൂരില്‍ വന്‍ കുഴല്‍പ്പണ വേട്ട. കാറില്‍ കടത്തിയ രണ്ട് കോടി രൂപയുടെ കുഴല്‍പ്പണമാണ് പൊലീസ് പിടികൂടിയത്. സംഭവത്തിൽ മൂവാറ്റുപുഴ വാഴക്കുളം സ്വദേശികളായ രണ്ടു പേര്‍ അറസ്റ്റിലായിട്ടുണ്ട്. മൂവാറ്റുപുഴ വാഴക്കുളം സ്വദേശികളായ അമല്‍ മോഹന്‍, അഖില്‍ സജീവ് എന്നിവരെയാണ് പിടികൂടിയത്.
പൊലീസിന് ലഭിച്ച രഹസ്യവിവരത്തെ തുടര്‍ന്ന് എം സി റോഡില്‍ നടത്തിയ പരിശോധനയിലാണ് പണവുമായി ഇവർ പിടിയിലാകുന്നത്. കോയമ്പത്തൂരില്‍ നിന്ന് പണം കോട്ടയത്തേക്ക് കടത്താനായിരുന്നു ശ്രമം. ഇരുപത്തി അഞ്ച് ലക്ഷത്തിന്റെ എട്ട് കെട്ടുകളായാണ് നോട്ടുകള്‍ സൂക്ഷിച്ചിരുന്നത്. കാറിന്റെ ഡോറിനുള്ളില്‍ പണം ഒളിപ്പിച്ചു കടത്താനായിരുന്നു ശ്രമം നടന്നത്. ഇവരെ വിശദമായി ചോദ്യം ചെയ്യും. സംഭവത്തിന്‌ പിന്നിൽ മാറ്റാർക്കെങ്കിലും പങ്കുണ്ടോ എന്ന് പൊലീസ് അന്വേഷിച്ചു വരികയാണ്.
