മലപ്പുറം: തിരൂരില്‍ ഓടുന്ന ട്രെയിനില്‍ തീപ്പിടുത്തം. ഇന്ന് വൈകിട്ടോടെ എറണാകുളത്തു നിന്നും പുറപ്പെട്ട മംഗള- നിസാമുദ്ധീന്‍ എക്‌സ്പ്രസിലാണ് സംഭവം.തിരൂര്‍ റെയിൻവേ സ്റ്റേഷന് ഒരു കിലോമീറ്ററോളം ദൂരത്തിലുള്ള മുത്തൂര്‍ വിഷുപ്പാടത്ത് എത്തിയപ്പോഴാണ് തീപ്പിടുത്തമുണ്ടായത്.
അവസാന ബോഗിയായ ലഗേജ് കം ബ്രേക്ക് വാനിൻ്റെ അടിയില്‍ നിന്നും വൻതോതില്‍ തീയും പുകയുമുയര്‍ന്നതോടെ യാത്രക്കാര്‍ പരിഭ്രാന്തരായി ബഹളമുണ്ടാക്കി. ട്രെയിൻ നിര്‍ത്തിയോടെ സ്ത്രീകള്‍ അടക്കമുള്ള യാത്രക്കാര്‍ ട്രയിനില്‍ നിന്നും പുറത്തേക്ക് ചാടി.
ആറോളം അഗ്നിശമന ഉപകരണങ്ങള്‍ ഉപയോഗിച്ച്‌ ട്രെയിൻ എഞ്ചിനീയര്‍ അടക്കമുള്ള ഉദ്യോഗസ്ഥരും നാട്ടുകാരും ചേര്‍ന്നാണ് തീ അണച്ചത്. അധിക നേരം യാത്രാ തടസം വരുത്താതെ തീ അണച്ച്‌ അര മണികൂറിന് ശേഷം 5.20 ഓടെ ട്രെയിൻ സര്‍വീസ് പുനരാരംഭിച്ചു.
ട്രയിനിൻ്റെ ബ്രേക്കര്‍ ജാമായതിനെ തുടര്‍ന്നാണ് തീപ്പൊരി ചിതറി തീപ്പിടുത്തമുണ്ടായതെന്നാണ് പ്രാഥമിക നിഗമനം. അട്ടിമറി സംശയത്തെ തുടര്‍ന്ന് പൊലീസ് സംഘം തിരൂര്‍ റെയില്‍വേ സ്റ്റേഷനിലെത്തി വിവരങ്ങള്‍ ശേഖരിച്ചു.
തിരൂര്‍ ഡി വൈ എസ് പി കെ എം ബിജുവിൻ്റെ നേതൃത്വത്തിലായിരുന്നു അന്വേഷണം. തിരൂര്‍ സ്റ്റേഷനില്‍ നിര്‍ത്തിയ ട്രെയിനിലും പരിശോധന നടത്തിയ ശേഷമാണ് പുറപ്പെട്ടത്.
