തിരുവനന്തപുരം: ഒന്നു മുതൽ പത്ത് വരെയുള്ള ക്ലാസുകളിലെ അധ്യാപകർക്ക് റസിഡൻഷ്യൽ പരിശീലനം നൽകണമെന്ന് പാഠ്യപദ്ധതി പരിഷ്കരണ കമ്മിറ്റി. പുതുതായി ജോലിയിൽ പ്രവേശിക്കുന്നവർക്ക് മാത്രമാണ് ഇപ്പോൾ റസിഡൻഷ്യൽ പരിശീലനം നൽകുന്നത്. എന്നാൽ ഭാരിച്ച സാമ്പത്തിക ബാധ്യത അടക്കമുള്ള തടസങ്ങൾ ശുപാർശ നടപ്പാക്കാൻ വെല്ലുവിളിയാകും.
ചട്ടപ്പടി ക്ലസ്റ്റർ യോഗങ്ങൾ അധ്യാപകരുടെ അധ്യാപന മികവ് ഉയർത്തുന്നില്ലെന്ന വിലയിരുത്തലിലാണ് പാഠ്യപദ്ധതി പരിഷ്കരണ കമ്മിറ്റി. ഇതിന് ബദലായാണ് റസിഡൻഷ്യൽ ക്യാമ്പുകൾ വ്യാപകമാക്കാനുള്ള ശുപാർശ. ഹയർ സെക്കൻഡറി അധ്യാപകർക്കും, അധ്യാപകരായി ജോലിയിൽ പ്രവേശിക്കും മുൻപ് ഒന്ന് മുതൽ 10 വരെ ക്ലാസുകളിലെ അധ്യാപകർക്കും ഇപ്പോൾ റസിഡൻഷ്യൽ പരിശീലന ക്ലാസുകൾ നൽകുന്നുണ്ട്. ഇത് സർവീസിൽ ഉള്ളവർക്കും കൃത്യമായ ഇടവേളകളിൽ നൽകണമെന്നാണ് പാഠ്യപദ്ധതി പരിഷ്കരണ കമ്മിറ്റിയുടെ നിലപാട്.
