സഞ്ജയ് കുമാർ മിശ്രയുടെ ഇ ഡി ഡയറക്ടർ സ്ഥാനത്തിന്റെ കാലാവധി വീണ്ടും നീട്ടി നൽകി സുപ്രീം കോടതി. കേന്ദ്രസർക്കാരിന്റെ ആവശ്യ പ്രകാരം ദേശീയ താത്പര്യം കണക്കിലെടുത്താണ് കാലാവധി ഒരിക്കൽ കൂടി നീട്ടുന്നതെന്ന് വ്യക്തമാക്കിയ കോടതി ഇനി വീണ്ടും കാലാവധി നീട്ടില്ലെന്നും പറഞ്ഞു. അതിനായി ഒരു അപേക്ഷയും സ്വീകരിക്കില്ലെന്നും സുപ്രീം കോടതി കൂട്ടിച്ചേർത്തു.
എഫ് എ ടി എഫ് റിവ്യൂ കണക്കിലെടുത്താണ് ഇപ്പോൾ സുപ്രീം കോടതി തീരുമാനം. സെപ്തംബർ 15 ന് എസ് കെ മിശ്ര സ്ഥാനമൊഴിയണമെന്നും സുപ്രീം കോടതി ആവശ്യപ്പെട്ടു. ഈ മാസം 11നാണ് എസ്കെ മിശ്രയെ ഇഡി ഡയറക്ടർ സ്ഥാനത്ത് നിന്ന് നീക്കണമെന്ന് സുപ്രീം കോടതി വിധിച്ചത്. ജൂലൈ 31 വരെയായിരുന്നു അദ്ദേഹത്തിന് സുപ്രീം കോടതി വിധി പ്രകാരമുള്ള കാലാവധി. എന്നാൽ കേന്ദ്ര സർക്കാർ വീണ്ടും സുപ്രീം കോടതിയെ സമീപിച്ച് അന്തർദേശീയ വിഷയങ്ങളുമായി ബന്ധപ്പെട്ട് എസ്കെ മിശ്ര സ്ഥാനത്ത് തുടരേണ്ടത് അത്യാവശ്യമാണെന്ന് കോടതിയെ അറിയിക്കുകയായിരുന്നു. ഈ അപേക്ഷ പരിഗണിച്ചാണ് രണ്ടാഴ്ച കൂടി സ്ഥാനത്ത് തുടരാൻ സഞ്ജയ് കുമാർ മിശ്രയെ അനുവദിച്ചത്.
