തൃശൂർ: സംസ്ഥാന സ്കൂൾ കായികമേളയിൽ പാലക്കാട് ജില്ല ഏറെ മുന്നിൽ. 56 ഇനങ്ങൾ പൂർത്തിയായപ്പോൾ 133 പോയിൻ്റുമായി ഒന്നാം സ്ഥാനത്ത് തുടരുകയാണ് പാലക്കാട്. ജൂനിയർ ആൺകുട്ടികളുടെ 110 മീറ്റർ ഹർഡിൽസിൽ പാലക്കാട് വടവന്നൂർ വിഎംഎച്ച്എസിലെ വിദ്യാർത്ഥി കിരൺ കെ ദേശീയ റെക്കോർഡ് മറികടന്നു. 13.84 സെക്കൻഡു കൊണ്ടാണ് 110 മീറ്റർ ഹർഡിൽസിൽ കിരൺ ദേശീയ റെക്കോർഡ് മറികടന്നത്.
89 പോയിന്റോടെ രണ്ടാം സ്ഥാനത്ത് മലപ്പുറവും 61 പോയിന്റ് നേടിയ എറണാകുളം മൂന്നാം സ്ഥാനത്തുമാണ്. 44 പോയിന്റുള്ള കോഴിക്കോട് നാലാം സ്ഥാനത്താണ്. സ്കൂൾ വിഭാഗത്തിൽ മുൻ ചാമ്പ്യൻമാരായ മലപ്പുറം കടകശേരി ഐഡിയൽ സ്കൂളും കോതമംഗലം മാർ ബേസിലും തമ്മിൽ ഇഞ്ചോടിഞ്ച് പോരാട്ടത്തിലാണ്. നാല് ദിവസത്തെ കായികമേള നാളെ അവസാനിക്കും.
