തിരുവനന്തപുരം: കരുത്തരായ ബംഗാളിനെ 109 റൺസിന് കീഴടക്കി രഞ്ജി ട്രോഫിയിൽ സീസണിലെ ആദ്യ ജയം സ്വന്തമാക്കി കേരളം. ജയത്തോടെ പോയിന്റ് ടേബിളിൽ ആറാം സ്ഥാനത്ത്‌നിന്ന് മൂന്നാം സ്ഥാനത്തേക്ക് കേരളം ഉയർന്നു. കേരളം ഉയർത്തിയ 449 റൺസിന്റെ വിജയലക്ഷ്യം പിന്തുടർന്ന് മത്സരത്തിന്റെ അവസാന ദിനമായ ഇന്നലെ 77/2 എന്ന നിലയിൽ രണ്ടാം ഇന്നിംഗ്‌സ് പുനരാരംഭിച്ച ബംഗാൾ പൊരുതി നോക്കിയെങ്കിലും 309 റൺസിന് ഓൾഔട്ടായി. സ്‌കോർ: കേരളം 363/10, 265/6 ഡിക്ലയേർഡ്, ബംഗാൾ, 180/10, 339/10.
ബംഗാളിന്റെ ആദ്യ ഇന്നിംഗ്‌സിൽ ഒമ്പത് വിക്കറ്റ് വീഴ്ത്തിയ ജലജ് സക്‌സേന രണ്ടാം ഇന്നിംഗ്‌സിൽ നാല് വിക്കറ്റും വീഴ്ത്തി കേരളത്തിന്റെ വിജയശില്പിയായി. സക്‌സേന തന്നെയാണ് മാൻ ഓഫ് ദ മാച്ച്. ബേസിൽ തമ്പിയും ശ്രേയ് ഗോപാലും രണ്ട് വീതവും എൻബേസിൽ ഒരു വിക്കറ്റും വീഴ്ത്തി.ഷഹബാസ് അഹമ്മദ് (80), ഓപ്പണർ അഭിമന്യു ഈശ്വരൻ (65) എന്നിവർ ബംഗാളിനായി മികച്ച ബാറ്റിംഗ് പ്രകടനം നടത്തി. കരൺ ലാൽ (40), ക്യാപ്ടൻ മനോജ് തിവാരി (35), സുദീപ് കുമാർ (31) എന്നിവരും ഭേദപ്പെട്ട പ്രകടനം കാഴ്ചവച്ചു. ഏഴാം വിക്കറ്റിൽ 83 റൺസിന്റെ കൂട്ടുകെട്ടുണ്ടാക്കി ഷഹബാസും കരണും കേരളത്തിന് തലവേദന സൃഷ്ടിച്ചെങ്കിലും കരണിനെ പുറത്താക്കി എൻ. ബേസിൽ കേരളത്തിന് ബ്രേക്ക് ത്രൂ സമ്മാനിച്ചു. 80-ാം ഓവറിൽ ഷഹബാസിനെ രോഹൻ കുന്നുമ്മലിന്റെ കൈയിൽ എത്തിച്ച് ബേസിൽ തമ്പി ബംഗാൾ ഇന്നിംഗ്‌സിന് തിരശീലയിട്ട് കേരളത്തിന്റെ ജയം ഉറപ്പിച്ചു.
തോൽവിയോടെ പോയിന്റ് ടേബിളിൽ മൂന്നിൽ നിന്ന് ആറിലേക്ക് വീണ ബംഗാളിന്റെ സെമി പ്രതീക്ഷകൾ അവസാനിച്ചു.
രഞ്ജി ട്രോഫി: ബംഗാളിനെ കീഴടക്കി കേരളം
