പ്രേക്ഷകരെ ആവേശം കൊള്ളിക്കുന്ന സിനിമകള്‍ നിര്‍മ്മിച്ച് മലയാള സിനിമ നിര്‍മ്മാണ മേഖലയില്‍ ആധിപത്യം സ്ഥാപിച്ച നിര്‍മ്മാണ കമ്പനിയാണ് കാവ്യ ഫിലിം കമ്പനി. തിയറ്ററുകളില്‍ ഓളം സൃഷ്ടിച്ച് ബ്ലോക്ക്ബസ്റ്റര്‍ വിജയം നേടിയ ‘2018’ന്റെയും ‘മാളികപ്പുറം’ത്തിന്റെയും നിര്‍മ്മാണത്തിലൂടെ മലയാള സിനിമ ഇന്റസ്ട്രിയിലും പ്രേക്ഷക മനസ്സുകളിലും ഒരുപോലെ സ്ഥാനം പിടിച്ചു.
2019-ല്‍ പുറത്തിറങ്ങിയ അമേരിക്കന്‍ ചിത്രം ‘ആഫ്റ്റര്‍ മിഡ്‌നൈറ്റ്’ലൂടെ നിര്‍മ്മാണത്തിന് തുടക്കമിട്ട കാവ്യ ഫിലിം കമ്പനിയുടെ രണ്ടാമത്തെ ചിത്രം മമ്മൂട്ടിയെ നായകനാക്കി എം പത്മകുമാര്‍ സംവിധാനം ചെയ്ത ‘മാമാങ്കം’ആണ്. ‘നൈറ്റ് ഡ്രൈവ്’, ‘ചാവേര്‍’ എന്നിവയാണ് മറ്റ് നിര്‍മ്മാണ ചിത്രങ്ങള്‍. മലയാളത്തിലെ പ്രമുഖ നിര്‍മ്മാണ കമ്പനികളോട് കിടപിടിച്ച് മുന്‍നിരയിലെത്തിയ കാവ്യ ഫിലിം കമ്പനിയുടെ ഏറ്റവും പുതിയ സിനിമയാണ് അര്‍ജ്ജുന്‍ അശോകന്‍ കേന്ദ്ര കഥാപാത്രത്തെ അവതരിപ്പിക്കുന്ന ‘ആനന്ദ് ശ്രീബാല’. വിഷ്ണു വിനയ് സംവിധാനം ചെയ്യുന്ന ചിത്രം നാളെ , നവംബര്‍ 15 മുതല്‍ തിയറ്ററുകളിലെത്തും. അഭിലാഷ് പിള്ളയുടെതാണ് തിരക്കഥ.
