ഡൽഹി: മുൻ കേന്ദ്രമന്ത്രി മിലിന്ദ് ദേവ്റ കോൺഗ്രസ് വിട്ടു. രാജിക്കത്ത് കോൺഗ്രസ് നേതൃത്വത്തിന് സമർപ്പിച്ചു. 55 വർഷത്തെ കോൺഗ്രസ് ബന്ധം തൻ്റെ കുടുംബം അവസാനിപ്പിക്കുന്നതായി മിലിന്ദ് ദേവ് അറിയിച്ചു. രാഷ്ട്രീയ യാത്രയിലെ നിർണായക തീരുമാനമെന്നും മിലിന്ദ് എക്‌സിലെ കുറിപ്പിൽ സൂചിപ്പിച്ചു.കോൺഗ്രസിൽ തനിക്ക് നൽകിയ പിന്തുണയ്ക്ക് എല്ലാ സഹപ്രവർത്തകർക്കും നന്ദി അറിയിക്കുന്നതായും മിലിന്ദ് ദേവ്റ വ്യക്തമാക്കി. മുൻ യുപിഎ സർക്കാരിൽ സഹമന്ത്രിയായിരുന്നു മിലിന്ദ് ദേവ്റ. അന്തരിച്ച മുൻ കേന്ദ്രമന്ത്രിയും മുതിർന്ന കോൺഗ്രസ് നേതാവുമായിരുന്ന മുരളി ദേവ്റയുടെ മകനാണ്.മുംബൈ സൗത്ത് ലോക്‌സഭ മണ്ഡലത്തിൽ നിന്നും 2004 ലും 2009 ലും മിലിന്ദ് ദേവ്റ പാർലമെൻ്റിലേക്ക് വിജയിച്ചിരുന്നു. എന്നാൽ 2014 ലും 2019 ലും ശിവസേനയോട് പരാജയപ്പെട്ടു. ഇത്തവണ മുംബൈ സൗത്ത് മണ്ഡലം വേണെന്ന് ശിവസേന ഉദ്ധവ് താക്കറെ വിഭാഗം പരസ്യമായി ആവശ്യം ഉന്നയിച്ചിരുന്നു.മുംബൈ സൗത്തിൽ വീണ്ടും മത്സരിക്കാൻ തയ്യാറെടുക്കുന്നതിനിടെ, മഹാ വികാസ് അഗാഡി സഖ്യത്തിലെ ശിവസേനയുടെ പ്രഖ്യാപനത്തിൽ മിലിന്ദ് ദേവ്റ അതൃപ്‌തനായിരുന്നു. മിലിന്ദ് ദേവ്റ മഹാരാഷ്ട്ര മുഖ്യമന്ത്രി ഏക്‌നാഥ് ഷിൻഡെയുടെ ശിവസേനയിൽ ചേരുമെന്നാണ് റിപ്പോർട്ടുകൾ.
മുൻ കേന്ദ്രമന്ത്രി മിലിന്ദ് ദേവ്റ കോൺഗ്രസ് വിട്ടു
