കൊച്ചി: സാധാരണക്കാരുടെ ഒപ്പം നടന്നു കൊണ്ട് ഒരുമിച്ചു വളരുക എന്ന സന്ദേശം പ്രാവർത്തികമാക്കുന്ന സന്നദ്ധസംഘടനകൾ കാലഘട്ടത്തിൻ്റെ ആവശ്യമാണെന്ന് കൊച്ചി നഗരസഭാ മേയർ അഡ്വ.എം.അനിൽകുമാർ അഭിപ്രായപ്പെട്ടു.
എറണാകുളം – അങ്കമാലി അതിരൂപതാ സാമൂഹ്യ പ്രവർത്തന ഏജൻസി സഹൃദയയുടെ മൈക്രോ ഫിനാൻസ് വിഭാഗമായ വെസ്കോ ക്രഡിറ്റിൻ്റെ കീഴിൽ പ്രവർത്തിക്കുന്ന സ്വയംസഹായ സംഘം ആനിമേറ്റർമാരുടെ ഓണ സംഗമത്തിൽ 1000 ജോയിൻ്റ് ലയബിലിറ്റി ഗ്രൂപ്പുകൾ പൂർത്തിയാക്കിയതിൻ്റെ പ്രഖ്യാപനം നിർവഹിച്ചു സംസാരിക്കുകയായിരുന്നു അദ്ദേഹം. സാമ്പത്തിക സ്വയം പര്യാപ്തതയിലേക്ക് വനിതകളെ നയിക്കുന്ന പ്രവർത്തനങ്ങൾ നാടിൻ്റെ വികസനത്തിൻ്റെ അടിസ്ഥാന ഘടകമാണെന്നും അദ്ദേഹം പറഞ്ഞു. അതിരൂപതാ വികാരി ജനറൽ ഫാ.വർഗീസ് പൊട്ടയ്ക്കൽ അധ്യക്ഷനായിരുന്നു.
പരസ്പരമുള്ള കരുതലും വിശ്വസ്തതയും വളർത്തുവാൻജെ.എൽ.ജി.കൾ സഹായകമാണെന്ന് അദ്ദേഹം പറഞ്ഞു. ഫെഡറൽ ബാങ്ക് സീനിയർ വൈസ് പ്രസിഡൻ്റും സോണൽ ഹെഡുമായ രൺജി അലക്സ് മുഖ്യ പ്രഭാഷണം നടത്തി. കുറഞ്ഞ കാലയളവിനുള്ളിൽ ആയിരത്തിലധികം ജെ.എൽ.ജി.കൾ രൂപീകരിക്കുകയും 27 കോടിയിലധികം രൂപ സ്വയം തൊഴിൽ വായ്പയായി നൽകുകയും ചെയ്ത സഹൃദയയ്ക്ക് ഫെഡറൽ ബാങ്കിൻ്റെ ഉപഹാരം അദ്ദേഹം സമർപ്പിച്ചു. സഹൃദയ ഡയറക്ടർ ഫാ. ജോസ് കൊളുത്തുവെള്ളിൽ, അസി. ഡയറക്ടർ ഫാ. സിബിൻ മനയംപിള്ളി, നഗരസഭാ കൗൺസിലർ സക്കീർ തമ്മനം, ഫെഡറൽ ബാങ്ക് റീജിയണൽ ഹെഡ് ടി.എസ്.മോഹൻദാസ്, പാലാരിവട്ടം ബ്രാഞ്ച് മാനേജർ സ്നേഹ എം.നായർ, സഹൃദയ അസി.ജനറൽ മാനേജർ സുനിൽ സെബാസ്റ്റ്യൻ, വെസ്കോ ക്രഡിറ്റ് ജെ.എൽ.ജി ഡവലപ്മെൻ്റ് ഓഫീസർ സി.ജെ. പ്രവീൺ എന്നിവർ സംസാരിച്ചു. മികച്ച പ്രവർത്തനം കാഴ്ചവച്ച ബ്രാഞ്ച് മാനേജർമാർക്കും കോർഡിനേറ്റർമാർക്കുമുള്ള പുരസ്കാരങ്ങൾ യോഗത്തിൽ വിതരണം ചെയ്തു.
