ഇംഫാല്‍: മണിപ്പൂർ വീണ്ടും നടന്ന വെടിവെപ്പിൽ ഒരു മരണം. ബിഷ്ണുപൂർ ജില്ലയിലാണ് ഒരാൾ കൊല്ലപ്പെട്ടത്. ഇതോടെ ബിഷ്ണുപൂർ ജില്ലയിൽ 36 മണിക്കൂറിനിടെ മരിച്ചവരുടെ എണ്ണം 3 ആയി. നരൻസീന ഗ്രാമത്തിൽ കുക്കി മെയ്തെയ് വിഭാഗങ്ങൾ തമ്മിൽ വെടിവെപ്പ് തുടരുന്നതിനിടെയാണ് ഒരാൾ കൊല്ലപ്പെട്ട വിവരം പുറത്ത് വന്നത്. 36 മണിക്കൂറിലധികമായി ഇവിടെ വെടിവെപ്പ് തുടരുകയാണ്.
നേരത്തെ നരൻസീന ഗ്രാമത്തിലെ സലാം ജോതിൻ സിംഗ് എന്ന കർഷകന് നേരെ വെടിവെച്ചതോടെയാണ് വെടിവെപ്പ് ആരംഭിച്ചത്. വെടിവെപ്പിൽ സലാം ജോതിൻ സിംഗ് പരിക്കുകളോടെ രക്ഷപ്പെട്ടു. സൈന്യവും അസം റൈഫിൾസും പ്രദേശത്ത് നിലനിൽക്കുന്നുണ്ട്. സ്ഥിതിഗതികൾ സംഘർഷഭരിതമാണെന്നും ഉദ്യോഗസ്ഥർ അറിയിച്ചു.
അതേസമയം മണിപ്പൂരിലെ സംഘർഷബാധിത പ്രദേശങ്ങളിൽ നിന്ന് ആയുധങ്ങൾ കണ്ടെടുത്തിരുന്നു. പടിഞ്ഞാറൻ ഇംഫാൽ, തൗബാൽ ജില്ലകളിലെ വനമേഖലയിലെ രണ്ട് വ്യത്യസ്ത സ്ഥലങ്ങളിൽ നിന്ന് 13 ഗ്രനേഡുകൾ, 10 ഗ്രനേഡ് ലോഞ്ചറുകൾ, എം -16 റൈഫിൾ, മറ്റ് ആയുധങ്ങൾ എന്നിവ കൂടാതെ 19 സ്‌ഫോടക വസ്തുക്കളുമാണ് പൊലീസുമായി ചേർന്ന് നടത്തിയ സംയുക്ത ഓപ്പറേഷനിൽ സുരക്ഷാ സേന കണ്ടെടുത്തത്.
