തിരുവനന്തപുരം: വിദ്യാര്‍ഥികളുടെ യാത്രാ നിരക്ക്‌ വര്‍ധിപ്പിക്കാതെ മുന്നോട്ടു പോകാനാകില്ലെന്നു സംസ്ഥാനത്തെ സ്വകാര്യ ബസ് ഉടമകള്‍.നവംബര്‍ 21 മുതല്‍ അനിശ്ചിതകാല സമരം തുടങ്ങുമെന്നും വാര്‍ത്താസമ്മേളനത്തില്‍ അറിയിച്ചു. ഒക്ടോബര്‍ 31 ലെ സമരത്തില്‍ നിന്ന് പിന്നോട്ടില്ല. നവംബര്‍ ഒന്നു മുതല്‍ സീറ്റ് ബെല്‍റ്റും കാമറയും നിര്‍ബന്ധമാക്കുന്നതില്‍ ഗതാഗത മന്ത്രിക്കെതിരെ ബസ് ഉടമകള്‍ പ്രതിഷേധം രേഖപ്പെടുത്തി.
സീറ്റ് ബെല്‍റ്റും കാമറയും നവംബര്‍ ഒന്നിനകം വെക്കാൻ പറ്റില്ലെന്നും ഇതിന് കൂടുതല്‍ സമയം നല്‍കണമെന്നുമാണ് ബസ് ഉടമകളുടെ ആവശ്യം. ഏപ്രില്‍ വരെ സമയം നല്‍കണമെന്നും ഇവര്‍ ആവശ്യപ്പെട്ടു.
വിദ്യാര്‍ത്ഥികളുടെ യാത്രക്കൂലി വര്‍ധന, ബസുകളില്‍ സീറ്റ് ബെല്‍റ്റും കാമറയും നിര്‍ബന്ധമാക്കിയ തീരുമാനം എന്നിവയില്‍ മാറ്റം വരുത്തണമെന്ന് ആവശ്യപ്പെട്ടാണ് ഒക്ടോബര്‍ 31 ന് ബസ് സമരം പ്രഖ്യാപിച്ചിരിക്കുന്നത്. ഈ ആവശ്യങ്ങള്‍ ഉന്നയിച്ചത് സ്വകാര്യ ബസുകളുടെ സംയുക്തസമര സമിതി ഗതാഗതമന്ത്രിക്ക് നിവേദനം നല്‍കിയിരുന്നു.
