കാസർകോഡ് : കുറ്റിക്കോലില്‍ നിയന്ത്രണം വിട്ട കുഴല്‍ക്കിണർ നിർമാണ ലോറി മീൻ കയറ്റാൻ പോകുന്ന മിനി പിക്കപ്പ് വാനിലിടിച്ച്‌ ഒരാള്‍ മരിച്ചു.മിനി പിക്കപ്പ് വാൻ ഓടിച്ച കൊട്ടോടി സ്വദേശി ജിജോ ജോസഫ് (30) ആണ് മരിച്ചത്. കുറ്റിക്കോലില്‍ നിന്നും അറത്തൂട്ടിപ്പാറ വഴി ചുള്ളിക്കര ഭാഗത്തേക്ക് പോവുന്ന ലോറി കളക്കരയില്‍ ഇറക്കത്തില്‍ നിയന്ത്രണം വിട്ട് കുറ്റിക്കോല്‍ ഭാഗത്തേക്ക് പോവുകയായിരുന്ന മിനി പിക്കപ്പ് വാനില്‍ ഇടിക്കുകയായിരുന്നു.
ലോറിയും മിനി പിക്കപ്പ് വാനും റോഡരികില്‍ താഴ്ചയിലേക്ക് മറിഞ്ഞു. പിക്കപ്പ് വാനില്‍ കുടുങ്ങി കിടന്ന ജിജോയെ അഗ്നി രക്ഷാസേനയെത്തിയാണ് പുറത്തെടുത്തത്. ലോറിയിലുണ്ടായിരുന്ന തമിഴ്നാട് സ്വദേശികളായ മണി, കേശവൻ, അണ്ണാമല, കറുപ്പയ്യ എന്നീ നാല് പേരെ പരിക്കുകളോടെ ആശുപത്രിയില്‍ പ്രവേശിപ്പിച്ചു.
