തൃശൂർ: മുതിർന്ന മാധ്യമ പ്രവർത്തകനും കേരള ലളിതകലാ അക്കാദമി മുൻ ചെയർമാനും താന്ത്രിക് ചിത്രകാരനുമായ കെ എ ഫ്രാൻസിസ് (76) അന്തരിച്ചു. ഹൃദയസംബന്ധമായ അസുഖത്തെ തുടർന്ന് ചികിത്സയിലിരിക്കെയാണ് അന്ത്യം സംഭവിച്ചത്. ഇന്ന് രാവിലെ 10 മുതൽ ഒന്ന് വരെ ലളിതകലാ അക്കാദമിയിൽ പൊതുദർശനത്തിന് വച്ച ശേഷം നാളെ കോട്ടയത്താണ് സംസ്കാരം. മലയാള മനോരമയിൽ അരനൂണ്ട് കാലത്തോളം പ്രവർത്തിച്ച അദ്ദേഹം മനോരമ ആഴ്ചപ്പതിപ്പിൽ എഡിറ്റർ ഇൻ ചാർജായിട്ടുണ്ട്.
പ്രശസ്ത ചിത്രകാരനും കോഴിക്കോട്ടെ യൂണിവേഴ്സൽ ആർട്സ് സ്ഥാപകനുമായ കെ പി ആന്റണിയുടെ മകനായി തൃശൂർ കുറുമ്പിലാവിൽ 1947 ഡിസംബർ ഒന്നിനാണ് കെ എ ഫ്രാൻസിസിന്റെ ജനനം. 1970ലാണ് മനോരമയിൽ പത്രപ്രവർത്തകനായി ജോലിയിൽ കയറുന്നത്. 1999 മുതൽ 2002 വരെ കണ്ണൂർ യൂണിറ്റ് മേധാവിയായും തുടർന്ന് ആഴ്ചപ്പതിപ്പിന്റെ ചുമതല ഏറ്റെടുത്തു. 2021 ഡിസംബർ 31നാണ് മനോരമയിൽ നിന്നും വിരമിച്ചത്.
