കോടതിയിൽ ഹാജരാക്കാൻ കൊണ്ടു പോകുന്നതിനിടെ രാജസ്ഥാനിൽ ഗുണ്ടാതലവൻ കൊല്ലപ്പെട്ടതായി റിപ്പോർട്ട്. പൊലീസ് സുരക്ഷയിൽ കോടതിയിൽ ഹാജരാക്കാൻ കൊണ്ടു പോകുന്നതിനിടെയാണ് പോലീസിനെ ഞെട്ടിച്ച കൊലപാതകമുണ്ടായത്. ബി.ജെ.പി നേതാവിനെ കൊലപ്പെടുത്തിയ കേസിലെ പ്രതി കുൽദീപ് ജാഗിനയെയാണ് വെടിവെച്ച് കൊന്നത്.ജയ്പൂർ ജയിലിൽ നിന്നും ഭരത്പൂർ കോടതിയിലേക്ക് കൊണ്ടുപോകുന്നതിനിടെയാണ് ആക്രമണമുണ്ടായത്. കുൽദീപിന് നിരവധി തവണ വെടിയേട്ടിട്ടുണ്ട്. അക്രമത്തിന് ശേഷം പ്രതികൾ ഓടി രക്ഷപ്പെടുകയായിരുന്നു എന്നാണ് പുറത്തു വരുന്ന വിവരം. അമോലി ടോൾ പ്ലാസക്ക് സമീപമാണ് ആക്രമണമുണ്ടായത്. വെടിവെപ്പിൽ പൊലീസുകാർക്കും പരിക്കേറ്റിട്ടുണ്ട്. ഇവരെ ആശുപത്രിയിൽ പ്രവേശിപ്പിച്ചു.കുൽദീപ് ജാഗിനയും മറ്റ് പ്രതികളും സഞ്ചരിച്ച ബസ് അക്രമികൾ തടയുകയായിരുന്നു. തുടർന്ന് പൊലീസുകാർക്ക് നേരെ മുളക് പൊടിയെറിഞ്ഞാണ് വെടിയുതിർത്തത്. കേസിലെ മറ്റൊരു പ്രതിയായ വിജയ്പാൽ വെടിവെപ്പിൽ പരിക്കേറ്റ് ഗുരുതരാവസ്ഥയിൽ ആശുപത്രിയിൽ ചികിത്സയിലാണെന്ന് പൊലീസ് അറിയിച്ചു.
കോടതിയിൽ ഹാജരാക്കാൻ കൊണ്ടു പോകുന്നതിനിടെ ഗുണ്ടാതലവൻ വെടിയേറ്റ് കൊല്ലപ്പെട്ടു
