അമരാവതി ഇന്നർ റിംഗ് റോഡ് കേസ്, ആങ്കല്ലു ആക്രമണക്കേസിലെ പതിവ് ജാമ്യാപേക്ഷയും ഫൈബർ നെറ്റ് കേസിൽ മുൻകൂർ ജാമ്യാപേക്ഷയും ആവശ്യപ്പെട്ട് തെലുങ്ക് ദേശം പാർട്ടി (ടിഡിപി) അധ്യക്ഷൻ എൻ ചന്ദ്രബാബു നായിഡു കോടതിയെ സമീപിച്ചതിനെ തുടർന്നു ജാമ്യാപേക്ഷകൾ ആന്ധ്രപ്രദേശ് ഹൈക്കോടതി തള്ളി.
അമരാവതി തലസ്ഥാന നഗരിയുടെ മാസ്റ്റർ പ്ലാനിൽ കൃത്രിമം കാണിച്ചതുമായി ബന്ധപ്പെട്ടതാണ് അമരാവതി ഇന്നർ റിംഗ് റോഡ് കേസ്. അന്നമയ്യ ജില്ലയിലെ ആങ്കല്ലുവിലും ചിറ്റൂർ ജില്ലയിലെ പുംഗനുരുവിലും നടന്ന കല്ലേറിലും തീവെപ്പിലും കലാപത്തിലും നിരവധി പോലീസുകാർക്കും ടിഡിപിയുടെയും ഭരണകക്ഷിയായ വൈഎസ്ആർസിപിയുടെയും അനുയായികൾക്കും പരിക്കേറ്റിരുന്നു.
330 കോടി രൂപയുടെ എപി ഫൈബർ നെറ്റ് പ്രോജക്ടിന്റെ ഫേസ്-1 പ്രകാരമുള്ള വർക്ക് ഓർഡർ ഇഷ്ട കമ്പനിക്ക് അനുവദിക്കുന്നതിനായി ടെൻഡറിൽ കൃത്രിമം കാണിച്ചെന്നതാണ് ഫൈബർ നെറ്റ് കേസ്. ടെൻഡർ അനുവദിച്ചതു മുതൽ മൊത്തം പദ്ധതിയുടെ പൂർത്തീകരണം വരെ ക്രമക്കേട് നടന്നതായും ഇത് സംസ്ഥാന ഖജനാവിന് വൻ നഷ്ടമുണ്ടാക്കിയതായും ക്രൈം ഇൻവെസ്റ്റിഗേഷൻ വിഭാഗം ആരോപിരിച്ചിരുന്നു.
നൈപുണ്യ വികസന കോർപ്പറേഷനിൽ നിന്നുള്ള ഫണ്ട് ദുരുപയോഗം ചെയ്‌ത് സംസ്ഥാന ഖജനാവിന് 300 കോടിയിലധികം രൂപയുടെ നഷ്‌ടം വരുത്തിയെന്നാരോപിച്ച് നിലവിൽ രാജമഹേന്ദ്രവാരം സെൻട്രൽ ജയിലിൽ ജുഡീഷ്യൽ കസ്റ്റഡിയിലാണ് നായിഡു.
നൈപുണ്യ വികസന കേസിൽ സെപ്റ്റംബർ 9-നാണ് ചന്ദ്രബാബു നായിഡുവിനെ അറസ്റ്റ് ചെയ്തത്. കേസിൽ സംസ്ഥാന ക്രൈം ഇൻവെസ്റ്റിഗേഷൻ ഡിപ്പാർട്ട്‌മെന്റ് (സിഐഡി) ഫയൽ ചെയ്ത എഫ്‌ഐആർ റദ്ദാക്കണമെന്ന് ആവശ്യപ്പെട്ട് നായിഡു നൽകിയഹർജി സുപ്രീം കോടതി നിരസിച്ചിരുന്നു.
അതേസമയം ചന്ദ്രബാബു നായിഡുവിന്റെ അറസ്റ്റിൽ ഇടപെടണമെന്നാവശ്യപ്പെട്ട് മകനും തെലുങ്കുദേശം പാർട്ടി (ടിഡിപി) ജനറൽ സെക്രട്ടറിയുമായ നാരാ ലോകേഷ് രാഷ്ട്രപതി ദ്രൗപതി മുർമുവുമായി കൂടിക്കാഴ്ച നടത്തി. അറസ്റ്റ് നിയമവിരുദ്ധമാണെന്നും മുഖ്യമന്ത്രി ജഗൻ മോഹൻ റെഡ്ഡിയുടെ രാഷ്ട്രീയ പകപോക്കലിന്റെ ഫലമാണെന്നും ലോകേഷ് ആരോപിച്ചു.
“ഇത് കെട്ടിച്ചമച്ച കേസാണ്. അഴിമതി തെളിയിക്കാൻ സാധുവായ തെളിവുകളൊന്നും നിലവിലില്ല. ഞങ്ങളുടെ നേതാവിനെതിരെ ഉന്നയിക്കപ്പെട്ട ആരോപണങ്ങൾ വ്യാജമാണ്. ഈ ആരോപണങ്ങൾ അദ്ദേഹത്തിന്റെ കളങ്കരഹിതവും അഴിമതിരഹിതവുമായ പ്രശസ്തിക്ക് കളങ്കമുണ്ടാക്കാൻ ലക്ഷ്യമിട്ടുള്ള രാഷ്ട്രീയ ഗൂഢാലോചന ഫലമാണ്, ”- ലോകേഷ് രാഷ്ട്രപതിക്ക് എഴുതിയ കത്തിൽ പറഞ്ഞു.
വൈഎസ്ആർസിപി അധികാരത്തിൽ വന്നതുമുതൽ ആരംഭിച്ച പ്രതികാര രാഷ്ട്രീയത്തിന്റെയും അധികാര ദുർവിനിയോഗത്തിന്റെയും പരിസമാപ്തിയാണ് നായിഡുവിന്റെ അറസ്റ്റെന്നും ലോകേഷ് ആരോപിച്ചു. ഈ വിഷയത്തിൽ ഇടപെടണമെന്ന് പ്രസിഡന്റ് മുർമുവിനോട് അഭ്യർത്ഥിച്ച ലോകേഷ് തന്റെ പിതാവിനെതിരായ അടിസ്ഥാന രഹിതമായ ആരോപണങ്ങൾക്കെതിരെ പിന്തുണ തേടുകയും ചെയ്തു.
