തൃശ്ശൂരിലെ ബിജെപിയുടെ വിജയം കോൺഗ്രസുമായുള്ള ഡീലിന്റെ ഫലമെന്ന് മുഖ്യമന്ത്രി പിണറായി വിജയൻ. കോൺഗ്രസിന് നഷ്ടപ്പെട്ട വോട്ട് ബിജെപിയിൽ വന്നപ്പോഴാണ് തൃശ്ശൂരിൽ ജയിച്ചതെന്നും ഇരുവരും തമ്മിലുള്ള മാനസിക ഐക്യം അത്രത്തോളം ഉണ്ടെന്നും അദ്ദേഹം വിമർശിച്ചു.
യുഡിഎഫും ബിജെപിയും കേരളത്തിൽ എൽഡിഎഫിനെ തറ പറ്റിക്കുന്നതിനായി ഒരുമിച്ച് പ്രവർത്തിക്കുകയാണെന്നും അദ്ദേഹം കുറ്റപ്പെടുത്തി.നാടിൻ്റെ പ്രശ്നങ്ങൾക്ക് ഒപ്പം നിൽക്കുന്ന രീതിയല്ല കോൺഗ്രസും ബിജെപിയും സ്വീകരിച്ചിട്ടുള്ളത് എന്നും കേരളത്തിൻ്റെ ആവശ്യത്തിന് ഒപ്പം നിൽക്കാൻ രണ്ട് കൂട്ടരും തയ്യാറായിട്ടില്ല എന്നും അദ്ദേഹം ആരോപിച്ചു. ദുരന്തങ്ങളിൽ സഹായിക്കുകയല്ല മറിച്ച് നാടിനെ കൂടുതൽ പ്രതിസന്ധികളിലേക്ക് തള്ളിവിടുന്ന സമീപനം ആണ് കേന്ദ്രസർക്കാരിൻ്റേത് എന്നും മുഖ്യമന്ത്രി കുറ്റപ്പെടുത്തി.
