ന്യൂഡല്‍ഹി: മൂന്ന് സംസ്ഥാനങ്ങളിലെ മുഖ്യമന്ത്രിമാരെ ബിജെപി ഉടന്‍ പ്രഖ്യാപിച്ചേക്കും. പാര്‍ട്ടിയുടെ നിര്‍ണ്ണായക യോഗം ഇന്ന് ഡല്‍ഹിയില്‍ ചേരും. മധ്യപ്രദേശ്, ഛത്തീസ്ഗഢ്, രാജസ്ഥാന്‍ സംസ്ഥാനങ്ങളിലെ മുഖ്യമന്ത്രിമാരെ സംബന്ധിച്ച് അന്തിമ തീരുമാനം ഈ യോഗത്തില്‍ ഉണ്ടാവും.
അതിനിടെ രാജസ്ഥാന്‍ മുന്‍ മുഖ്യമന്ത്രിയും മുതിര്‍ന്ന ബിജെപി നേതാവുമായ വസുന്ധര രാജെ ഡല്‍ഹിയിലെത്തി. ബുധനാഴ്ച്ച രാത്രി ഡല്‍ഹിയിലെത്തിയ വസുന്ധരെ യോഗം സംബന്ധിച്ചും മുഖ്യമന്ത്രി പദം സംബന്ധിച്ചുമുള്ള ചോദ്യങ്ങളില്‍ നിന്നും ഒഴിഞ്ഞുമാറി. മരുമകളെ കാണാന്‍ വേണ്ടിയാണ് ഡല്‍ഹിയിലെത്തിയതെന്നായിരുന്നു പ്രതികരണം. രണ്ട് തവണ മുഖ്യമന്ത്രിയായ വസുന്ധര രാജെ രാജസ്ഥാനിലെ ആദ്യത്തെ ബിജെപി മുഖ്യമന്ത്രിയാണ്.
