എയര്‍ ഇന്ത്യ വിമാനങ്ങളില്‍ നവംബര്‍ 19ന് സ്‌ഫോടനം നടത്തുമെന്ന ഭീഷണിയുമായി ഖാലിസ്ഥാന്‍ തീവ്രവാദ സംഘടന. എയര്‍ ഇന്ത്യയെ സര്‍വീസ് നടത്താന്‍ അനുവദിക്കില്ലെന്ന് അവകാശപ്പെടുന്ന വീഡിയോ പുറത്തിറക്കിയിരിക്കുന്നത് നിരോധിത സിഖ് ഫോര്‍ ജസ്റ്റിസിന്റെ (എസ്‌എഫ്‌ജെ) സ്ഥാപകനായ ഭീകരന്‍ ഗുര്‍പത്വന്ത് സിംഗ് പന്നൂന്‍ ആണ്.നവംബര്‍ 19 ന് എയര്‍ ഇന്ത്യ വിമാനങ്ങളില്‍ യാത്ര ചെയ്യരുതെന്ന് സിഖുകാര്‍ക്ക് മുന്നറിയിപ്പ് നല്‍കിയതായും വീഡിയോയില്‍ പറയുന്നു.
ക്രിക്കറ്റ് ലോകകപ്പിന്റെ ഫൈനല്‍ മത്സരം നടക്കുന്നത് ഇതേ ദിവസമാണെന്ന് പന്നൂന്‍ എടുത്തുപറഞ്ഞതും ശ്രദ്ധേയമാണ്. ഡല്‍ഹിയിലെ ഇന്ദിരാഗാന്ധി ഇന്റര്‍നാഷണല്‍ (ഐജിഐ) വിമാനത്താവളം നവംബര്‍ 19ന് അടച്ചിടുമെന്നും അതിന്റെ പേര് മാറ്റുമെന്നും പന്നൂന്‍ അവകാശപ്പെട്ടു. പഞ്ചാബ് വിമോചിതമാകുമ്ബോള്‍ ഐജിഐ വിമാനത്താവളത്തിന്റെ പേര് ഷാഹിദ് ബിയാന്ത് സിംഗ്, ഷാഹിദ് സത്വന്ത് സിംഗ് ഖാലിസ്ഥാന്‍ എയര്‍പോര്‍ട്ട് എന്നായിരിക്കുമെന്നും ഗുര്‍പത്വന്ത് പന്നൂന്‍ പറയുന്നു.’നവംബര്‍ 19 ന് എയര്‍ ഇന്ത്യയില്‍ യാത്ര ചെയ്യരുതെന്ന് ഞങ്ങള്‍ സിഖ് ജനതയോട് ആവശ്യപ്പെടുന്നു. ആഗോള തലത്തില്‍ ഉപരോധങ്ങള്‍ ഉണ്ടാകും. നവംബര്‍ 19ന് എയര്‍ ഇന്ത്യയില്‍ യാത്ര ചെയ്യരുത്, അല്ലെങ്കില്‍ നിങ്ങളുടെ ജീവന്‍ അപകടത്തിലാകും’ സോഷ്യല്‍ മീഡിയയിലൂടെ പുറത്തുവിട്ട വീഡിയോയില്‍ ഗുര്‍പത്വന്ത് പന്നൂന്‍ പറയുന്നു.
