നൈനിറ്റാൾ: ഏകദിന സന്ദർശനത്തിനായി ഉത്തരാഖണ്ഡിലെത്തിയ പ്രധാനമന്ത്രി നരേന്ദ്രമോദി പിത്തോരഗഡിലെ പാർവതി കുണ്ഡിൽ പൂജ നടത്തി. പ്രധാനമന്ത്രി മോദി തന്നെയാണ് പാർവതി കുണ്ഡിൽ പൂജ നടത്തുന്ന വീഡിയോ സമൂഹ മാധ്യമങ്ങളിൽ പങ്കുവെച്ചത്. ‘ഉത്തരാഖണ്ഡിലെ പിത്തോരഗഡിലെ വിശുദ്ധ പാർവതി കുണ്ഡിൽ… ദർശനവും ആരാധനയും കൊണ്ട് മതിമറന്നുപോയി. ഇവിടെ നിന്നുള്ള ആദി കൈലാസ ദർശനം മനസിന് ഏറെ സന്തോഷം നൽകുന്നു. രാജ്യത്തെ എല്ലാ കുടുംബാംഗങ്ങൾക്കും സന്തോഷകരമായ ജീവിതം ലഭിക്കട്ടെ.’- എന്ന അടിക്കുറിപ്പോടെയാണ് മോദി വീഡിയോ പങ്കുവച്ചിരിക്കുന്നത്.
സംസ്ഥാനത്ത് നിരവധി വികസന പ്രവർത്തനങ്ങൾക്ക് തറക്കല്ലിടുന്ന പ്രധാനമന്ത്രി പൊതുജനങ്ങളെയും അഭിസംബോധന ചെയ്യും. ഗുൻജി ഗ്രാമവും സന്ദർശിക്കും. രാവിലെ 8.30 ഓടെയാണ് പ്രധാനമന്ത്രി പിത്തോരഗഡിലെത്തിയത്. 4200 കോടി രൂപയുടെ വിവിധ വികസന പദ്ധതികൾക്കാണ് മോദി ഇന്ന് തറക്കല്ലിടുക. പ്രാദേശത്തെ ജനങ്ങളുമായി സംവദിക്കുന്നതിനൊപ്പം കരസേന, ഇന്തോടിബറ്റൻ ബോർഡർ പൊലീസ് (ഐടിബിപി) എന്നിവരുമായും ചർച്ച നടത്തും. അദ്ദേഹം പന്ത്രണ്ട് മണിയോടെ അൽമോറ ജില്ലയിലെ ജഗേശ്വറിൽ എത്തും. ജഗേശ്വര് ധാമിൽ പൂജയും ദർശനവും നടത്തും.
