ന്യൂഡല്‍ഹി: ബിഎസ്പിയില്‍ നിന്നും പുറത്തായ അംറോഹ എംപി ഡാനിഷ് അലി കോണ്‍ഗ്രസിലേക്കെന്ന് സൂചന. ഇന്ന് അംറോഹയിലെത്തുന്ന ഭാരത് ജോഡോ ന്യായ് യാത്രയില്‍ രാഹുല്‍ ഗാന്ധിക്കൊപ്പം ഡാനിഷ് അലിയും അണിചേരും.
എക്‌സിലൂടെയാണ് ഡാനിഷ് അലി ഇക്കാര്യം അറിയിച്ചത്. സമാജ്‌വാദി പാര്‍ട്ടിയുമായുള്ള സീറ്റ് ധാരണ പ്രകാരം അംറോഹ സീറ്റ് കോണ്‍ഗ്രസിനാണ്. അവിടെ നിന്നും ഡാനിഷ് അലി കോണ്‍ഗ്രസ് ടിക്കറ്റില്‍ മത്സരിക്കും.
ഭാരത് ജോഡോ ന്യായ് യാത്ര മണിപ്പൂരില്‍ നിന്നും ആരംഭിച്ച ഘട്ടത്തിലും ഡാനിഷ് അലി യാത്രയുടെ ഭാഗമായിരുന്നു. രാഷ്ട്രീയപ്രവര്‍ത്തകന്‍ എന്ന നിലയിലെ തന്റെ കര്‍ത്തവ്യം നിറവേറ്റുക മാത്രമാണ് ചെയ്തതെന്നായിരുന്നു അന്ന് പ്രതികരിച്ചത്.
