പുതുവര്‍ഷത്തിലും ആരാധകരെ ആവേശത്തിലാക്കി തന്റെ പുത്തൻ ചിത്രത്തിന്റെ പുതിയ പോസ്റ്ററുമായി എത്തിയിരിക്കുകയാണ് മെഗാസ്റ്റാര്‍ മമ്മൂട്ടി.ഭ്രമയുഗം’ എന്ന ചിത്രത്തിന്റെ പുത്തൻ പോസ്റ്റര്‍ ആണ് ഇപ്പോള്‍ താരം പങ്കുവെച്ചിരിക്കുന്നത്.
ഹൊറര്‍ ജോണറില്‍ പുറത്തിറക്കുന്ന മമ്മൂട്ടി ചിത്രമാണ് ‘ഭ്രമയുഗം’. മമ്മൂട്ടിയുടെ പിറന്നാള്‍ ദിനത്തില്‍ പുറത്തിറക്കിയ ചിത്രത്തിന്റെ ആദ്യ പോസ്റ്ററില്‍ കറപുരണ്ട പല്ലുകളും ഭയപ്പെടുത്തുന്ന ചിരിയുമായി എത്തിയ മമ്മൂട്ടിയുടെ ലുക്ക്‌ഏറെ ചര്‍ച്ച ചെയ്യപ്പെട്ടിരുന്നു.
മമ്മൂട്ടി കേന്ദ്ര കഥാപാത്രമായി എത്തിയ അടൂര്‍ ഗോപാലകൃഷ്ണൻ ചിത്രം ‘വിധേയൻ’ എന്ന ചിത്രത്തിലെ അതേ രൗദ്രതയും ക്രൂരതയും നിറഞ്ഞതാണ് ചിത്രത്തിന്റേതായി പുറത്തിറങ്ങിയ രണ്ട് പോസ്റ്ററുകളും. പ്രേക്ഷകര്‍ക്കുള്ള ന്യൂയര്‍ സമ്മാനമായാണ് പുതിയ പോസ്റ്റര്‍ ഇപ്പോള്‍ പുറത്തിറക്കിയിരിക്കുന്നത്.
‘ഭൂതകാലം’ എന്ന ഹൊറര്‍ ചിത്രത്തിലൂടെ ശ്രദ്ധേയനായ സംവിധായകൻ രാഹുല്‍ ആണ് ഈ ചിത്രത്തിന്റെ സംവിധാനം നിര്‍വഹിക്കുന്നത്. ചിത്രത്തിലെ മമ്മൂട്ടിയുടെ കഥാപാത്രത്തെ കുറിച്ച്‌ നിരവധി ഊഹാപോഹങ്ങള്‍ പുറത്തുവന്നിരുന്നുവെങ്കിലും സംവിധായകൻ അത്തരം വാര്‍ത്തകള്‍ എല്ലാം തള്ളുകയായിരുന്നു.
