തലയോലപ്പറമ്പ് : രോഗ പ്രതിരോധത്തിൽ ശ്രദ്ധയൂന്നി, ആരോഗ്യം മനുഷ്യന്റെ അവകാശമായി കണ്ട് ആരോഗ്യമുള്ള സമൂഹത്തിനായി കൈകോർക്കാനും ലക്ഷ്യമിട്ട് തലയോലപ്പറമ്പ് സെന്റ് ജോർജ് പള്ളിയിൽ നടക്കുന്ന ജീവൻ ദർശൻ ആരോഗ്യ സംരക്ഷണ ത്രിദിന സെമിനാർ ഇന്ന് രാത്രി എട്ടിനു സമാപിക്കും. കോട്ടയം ഗവ. മെഡിക്കൽ കോളേജിലെ പ്രൊഫസർ ഡോ. സെബാസ്റ്റ്യൻ മലയിൽ ഇന്ന് ക്ലാസ് നയിക്കും. ഒന്നാം ദിനത്തിൽമെഡിക്കൽ ഓങ്കോളജി പ്രൊഫസർ ഡോ. വിനീത തോമസും, രണ്ടാം ദിനത്തിൽ ജനറൽ മെഡിസിൻ വിഭാഗം തലവൻ ഡോ. സിറിൽ ജേക്കബും മുഖ്യ പ്രഭാഷണം നടത്തി.യുവാക്കളുടെ കുഴഞ്ഞു വീണു മരണം,അർബുദ, കിഡ്നി,കരൾ,നാഡി രോഗങ്ങളുടെ വർധന എന്നിവ പുതു തലമുറയുടെ ആരോഗ്യം ഹാനികരമാക്കുന്ന ഗുരുതര സാഹചര്യത്തിലാണ് കോട്ടയം നവജീവൻ ട്രസ്റ്റും തലയോലപ്പറമ്പ് സെന്റ് വിൻസെന്റ് ഡി പോൾ സൊസൈറ്റിയും ചേർന്ന് മൂന്ന് സായാഹ്നങ്ങളിലായി സെമിനാർ സംഘടിപ്പിക്കുന്നത്.തലയോലപ്പറമ്പ് സെന്റ് ജോർജ് പള്ളി വികാരി ഫാ. ഡോ. ബെന്നി ജോൺ മാരാംപറമ്പിൽ, നവജീവൻ ട്രസ്റ്റ് സാരഥി പി യു തോമസ് എന്നിവർ അനുഗ്രഹ പ്രഭാഷണം നടത്തി. 15 വയസിനു മുകളിൽ പ്രായമുള്ള എല്ലാവർക്കും ജാതി മത ഭേദമന്യേ ക്ലാസ്സിൽ പങ്കെടുക്കാം.കൈക്കാരന്മാരായ റിൻസൻ പന്നിക്കോട്ടിൽ, തങ്കച്ചൻ കളമ്പുകാട്ട്, സഹവികാരി ഫാ. ആൽജോ കളപ്പുരക്കൽ,കേന്ദ്ര സമിതി വൈസ് ചെയർ മാൻ ഇമ്മാനുവേൽ അരയത്തേൽ,ജോയ് ജോൺ നടുവിലെകുറിച്ചി, തോമസ് മാത്യു പാലച്ചുവട്ടിൽ എന്നിവർ പരിപാടികൾക്ക് നേതൃത്വം നൽകി.
തലയോലപ്പറമ്പിലെ ത്രിദിന ആരോഗ്യസെമിനാർ ഇന്ന് സമാപിക്കും
