തലയോലപ്പറമ്പ്: തലയോലപ്പറമ്പില്‍ അമിതവേഗതയില്‍ എത്തിയ സ്വകാര്യ ബസ് വയോധികയുടെ കാലിലൂടെ കയറി ഇറങ്ങി. വൈക്കം വൈക്കപ്രയാര്‍ കമ്മട്ടിത്തല രമണി(75)യ്ക്കാണ് വലതുകാലിനും കൈക്കും പരിക്കേറ്റത്. രമണിയെ ഉടന്‍ തലയോലപ്പ് ഗവ ആശുപത്രിയില്‍ പ്രവേശിപ്പിച്ചശേഷം വിദഗ്ധ ചികിത്സക്കായി കോട്ടയം മെഡിക്കല്‍ കോളേജ് ആശുപത്രിയിലേക്ക് മാറ്റി. തവെള്ളിയാഴ്ച വൈകീട്ട് 4.30-ന് തലയോലപ്പറമ്പ് പ്രൈവറ്റ് ബസ് സ്റ്റാന്‍ഡിലായിരുന്നു സംഭവം. എറണാകുളത്ത് നിന്നും കോട്ടയത്തേക്ക് വന്ന ആവേ മരിയ ബസാണ് അപകടം ഉണ്ടാക്കിയത്. സ്റ്റാന്‍ഡിനുള്ളിലൂടെ നടന്നുവന്ന രമണിയെ ബസ് തട്ടി. നിലത്തുവീണ രമണിയുടെ കാലിലൂടെ ബസ് കയറി ഇറങ്ങുകയായിരുന്നു. സംഭവം കണ്ട് നിന്ന മറ്റുയാത്രക്കാരും ഓട്ടോഡ്രൈവര്‍മാരും ബഹളംവെച്ചതിനെ തുടര്‍ന്നാണ് ബസ് നിര്‍ത്തിയത്. നാട്ടുകാര്‍ ചേര്‍ന്ന് രമണിയെ ആശുപത്രിയില്‍ പ്രവേശിപ്പിക്കുകയായിരുന്നു. ഇതിനിടെ നാട്ടുകാര്‍ ബസിനു ചുറ്റുകൂടി ബഹളംവെച്ചു. തലയോലപ്പറമ്പ് പോലീസ് സ്ഥലത്തെത്തിയാണ് സ്ഥിതിഗതികള്‍ ശാന്തമാക്കിയത്. പോലീസ് ബസ് സ്റ്റാന്‍ഡിനുള്ളിലേക്ക് മാറ്റിയിടാന്‍ ഡ്രൈവറോടും കണ്ടക്ടറോടും നിര്‍ദേശിച്ചു. ഈ സമയം അപകടം ഉണ്ടാക്കിയ ബസുമായി ഇരുവരും കടന്നുകളയുകയായിരുന്നു. പോലീസ് നടത്തിയ പരിശോധയില്‍ മിക്ക ബസുകള്‍ക്കും പെര്‍മിറ്റില്ലെന്ന് കണ്ടെത്തിയിട്ടുണ്ട്. ബസുകള്‍ തടഞ്ഞ് ഡിവൈഎഫ്‌ഐവയോധികയുടെ കാലിലൂടെ ആവേമരിയ ബസ് കയറി ഇറങ്ങിയതിനെ തുടര്‍ന്ന് ഡിവൈഎഫ്‌ഐ തലയോലപ്പറമ്പ് ബ്ലോക്ക് കമ്മിറ്റിയുടെ നേതൃത്വത്തില്‍ ബസുകള്‍ തടഞ്ഞു. കോട്ടയം, എറണാകുളം ഭാഗത്ത് നിന്നും എത്തിയ നാല് ബസുകളാണ് തടഞ്ഞത്. ഇതേ തുടര്‍ന്ന് ബസ് ജീവനക്കാരും ഡിവൈഎഫ്‌ഐ പ്രവര്‍ത്തകരും തമ്മില്‍ വാക്കുതര്‍ക്കവും സംഘര്‍ഷാവസ്ഥയും ഉണ്ടായി. പോലീസ് ഇടപെട്ടാണ് സ്ഥിതിഗതികള്‍ ശാന്തമാക്കിയത്. തുടര്‍ന്ന് ഡിവൈഎഫ്‌ഐ പ്രവര്‍ത്തകരും പോലീസും തമ്മില്‍ ചര്‍ച്ച നടത്തി. വയോധികയെ ഇടിച്ച ബസും ജീവനക്കാരെയും കസ്റ്റിഡിയിലെടുക്കണമെന്നും ആവശ്യമായ ചികിത്സയും സാമ്പത്തിക സഹായവും അനുവദിക്കണമെന്ന് ഡിവൈഎഫ്‌ഐ ആവശ്യപ്പെട്ടു. ഇക്കാര്യങ്ങള്‍ പോലീസ് അംഗീകരിച്ചതോടെയാണ് വാഹനങ്ങള്‍ പോകാന്‍ അനുവദിച്ചത്. തുടര്‍ന്ന് ഡിവൈഎഫ്‌ഐ ടൗണില്‍ പ്രതിഷേധ പ്രകടനം നടത്തി. ജില്ലാ സെക്രട്ടറിയേറ്റ് അംഗം ആര്‍.രോഹിത്, ജില്ലാ കമ്മറ്റിയംഗം സന്ദീപ് ദേവ്, ബ്ലോക്ക് സെക്രട്ടറി ആകാശ് യശോധരന്‍, ജി.സാജന്‍, മില്‍ട്ടന്‍ ആന്റണി തുടങ്ങിയവര്‍ നേതൃത്വം നല്‍കി. പഞ്ചായത്ത് അംഗത്തെ സ്വകാര്യ ബസ് ഡ്രൈവര്‍ ഭീഷണിപ്പെടുത്തിയ സംഭവം; എട്ടാംനാള്‍ വാഹനങ്ങള്‍ പരിശോധിച്ച് പോലീസും വാഹനവകുപ്പുംഭീഷണിപ്പെടുത്തുന്ന ദൃശ്യങ്ങള്‍ സാമൂഹിക മാധ്യമങ്ങളില്‍ വൈറല്‍തലയോലപ്പറമ്പ്: എതിര്‍ദിശയില്‍ അമിത വേഗതയില്‍ പാഞ്ഞെത്തിയ സ്വകാര്യ ബസിനു മുമ്പില്‍ ബൈക്കില്‍ നിശ്ചലനായി നിന്ന വെള്ളൂര്‍ പഞ്ചായത്ത് അംഗം കെ.എസ്.സച്ചിനെ ഡ്രൈവര്‍ ഭീഷണിപ്പെടുത്തിയ സംഭവത്തില്‍ വാഹനങ്ങള്‍ പരിശോധിച്ച് വാഹനവകുപ്പും പോലീസും. 14-ന് തലയോലപ്പറമ്പ് ടൗണിലാണ് കേസിനാസ്പദമായ സംഭവം നടക്കുന്നത്. ബൈക്കില്‍ ഇടതുവശം ചേര്‍ന്ന് സച്ചിന്‍ വരികയായിരുന്നു. ആവേ മരിയ എന്ന സ്വകാര്യ ബസ് തെറ്റായ ദിശയില്‍ വേഗത്തില്‍ പാഞ്ഞെത്തി. ബസിന്റെ വരവ് കണ്ട് സച്ചിന്‍ ബൈക്ക് നിര്‍ത്തി. തുടര്‍ന്ന് ഡ്രൈവര്‍ ബസ് നിര്‍ത്തി ഭീഷണിപ്പെടുത്തിയെന്നായിരുന്നു പരാതി. ഈ ദൃശ്യങ്ങള്‍ സാമൂഹിക മാധ്യമങ്ങളില്‍ വൈറലായി. പിറ്റേന്ന് തന്നെ സച്ചിന്‍ തലയോലപ്പറമ്പ് പോലീസിലും മുഖ്യമന്ത്രി, ഗതാഗതവകുപ്പ് മന്ത്രി, ട്രാന്‍സ്‌പോര്‍ട്ട് കമ്മീഷണര്‍ തുടങ്ങിയവര്‍ക്ക് പരാതി നല്‍കി. പരാതിയുടെ അടിസ്ഥാനത്തില്‍ ബസിന്റെ ഡ്രൈവറായ തലപ്പാറയില്‍ വാടകയ്ക്ക് താമസിക്കുന്ന എ.ജി. തമ്പിയുടെ പേരിലാണ് കേസ് എടുത്തിരിക്കുന്നതെന്ന് പോലീസ് പറഞ്ഞു. അപകടകരമായ രീതിയില്‍ വാഹനം ഓടിച്ചതിനെതിരെയാണ് കേസ്. വാഹനവകുപ്പ് ഉദ്യോഗസ്ഥര്‍ ബസും ബൈക്കും പരിശോധിച്ചു. ബസിന്റെ അകത്ത് നിന്നുള്ള സിസിടിവി ദൃശ്യങ്ങള്‍ ശേഖരിച്ചു. ബസിന്റെ ഉടമസ്ഥനെ കഴിഞ്ഞദിവസം വാഹനവകുപ്പ് ഉദ്യോഗസ്ഥര്‍ വിളിച്ചുവരുത്തി കാര്യങ്ങള്‍ വിശദീകരിച്ചു. അടുത്തദിവസം ഡ്രൈവറുടെ മൊഴി എടുക്കുമെന്ന് ഉദ്യോഗസ്ഥര്‍ അറിയിച്ചു. കോട്ടയം- എറണാകുളം റോഡില്‍ സര്‍വീസ് നടത്തുന്ന സ്വകാര്യബസുകളെക്കുറിച്ച് നിരവധി പരാതികളാണ് പോലീസിലും വാഹനവകുപ്പിലും ലഭിക്കുന്നത്. അസഭ്യംവിളിച്ചു, ജീവനക്കാര്‍ മോശമായി പെരുമാറി, മറ്റു വാഹനങ്ങളിലെ യാത്രക്കാരെ ഭീഷണിപ്പെടുത്തി തുടങ്ങിയ പരാതികളാണ് ഏറെയും. പരാതികളില്‍ പരിശോധന നടത്താനോ നിയമനടപടി സ്വീകരിക്കാനോ അധികൃതര്‍ ശ്രമം നടത്താറില്ലെന്നാണ് ജനങ്ങളുടെ ആരോപണം.
അമിതവേഗതയില്‍ എത്തിയ സ്വകാര്യ ബസ് വയോധികയുടെ കാലിലൂടെ കയറി ഇറങ്ങി
