ദോഹ: വിവിധ ഗൾഫ് രാജ്യങ്ങളിൽ ഇന്ത്യയുടെ 79-ാമത് സ്വാതന്ത്ര്യദിനാഘോഷം വർണ്ണോജ്വലമായി ആഘോഷിച്ചു. ഖത്തറിൽ ദോഹ ഇന്ത്യൻ എംബസി പരിസരത്ത് നടന്ന സ്വാതന്ത്ര്യദിനാചരണ ചടങ്ങിൽ ഇന്ത്യൻ അംബാസിഡർ വിപുൽ പതാക ഉയർത്തി. രാഷ്ട്ര പിതാവ് മഹാത്മാ ഗാന്ധിക്ക് ഉപചാരമർപ്പിച്ച് നടന്ന ചടങ്ങിലും കലാപരിപാടിയിലും വിവിധ ഇന്ത്യൻ സ്‌കൂൾ വിദ്യാർഥികൾ പങ്കെടുത്തു.സൗദി റിയാദിലെ ഇന്ത്യൻ എംബസിയിൽ നടന്ന സ്വാതന്ത്ര്യദിന ആഘോഷത്തിൽ എംബസി അധികൃതർ, മാധ്യമ പ്രവർത്തകർ പൊതുജനങ്ങൾ ഉൾപ്പെടെ ആയിരത്തിലധികം പേർ പങ്കെടുത്തു. ഇന്ത്യൻ അംബാസിഡർ ഡോ. സുഹേൽ അജാസ് ഖാൻ പതാക ഉയർത്തി.ഒമാനിൽ, മസ്കറ്റിലെ ഇന്ത്യൻ എംബസിയിൽ നടന്ന സ്വാതന്ത്ര്യദിനാഘോഷ ചടങ്ങിന് അംബാസഡർ ജീവി ശ്രീനിവാസ് നേതൃത്വം നൽകി. ഇന്ത്യയുടെ വൈവിധ്യമാർന്ന സംസ്കാരം ഉയർത്തിപ്പിടിക്കാൻ ആഹ്വാനം ചെയ്‌ത രാഷ്ട്രപതിയുടെ 79-ാമത് സ്വാതന്ത്ര്യദിന സന്ദേശം അദ്ദേഹം വായിച്ചു.യു.എ.ഇയിൽ അബൂദാബിയിലും ദുബായിലും വ്യത്യസ്ത ആചരണ ചടങ്ങുകൾ നടന്നു. അബൂദാബി ഇന്ത്യൻ മിഷനിൽ നടന്ന ചടങ്ങിൽ ഇന്ത്യൻ അംബാസിഡർ സഞ്ജയ് സുധീർ പതാക ഉയർത്തി.ബഹ്റൈനിലെ മനാമയിൽ ഇന്ത്യൻ എംബസി പരിസരത്ത് നടന്ന സ്വാതന്ത്ര്യ ദിനാചരണ ചടങ്ങിൽ ഇന്ത്യൻ അംബാസിഡർ വിനോദ് കെ.ജേക്കബ് പതാക ഉയർത്തി.കുവൈത്തിൽ നടന്ന ചടങ്ങിൽ ഡോ. ആദർശ് സ്‌വക പതാക ഉയർത്തി. ആഘോഷത്തിന്റെ ഭാഗമായി മധുരപലഹാരങ്ങൾ വിതരണം ചെയ്തു.ഗൾഫിലെ വിവിധ ഇന്ത്യൻ സ്‌കൂളുകളിലും സ്വാതന്ത്ര്യദിനാചരണ ചടങ്ങുകൾ അരങ്ങേറി.
ഖത്തറിലും മറ്റു ഗൾഫ് രാജ്യങ്ങളിലും ബഹുവിധ പരിപാടിളോടെ ഇന്ത്യൻ സ്വാതന്ത്ര്യദിനം ആഘോഷിച്ചു.
