കാറിന് പിന്നിൽ സ്വകാര്യ ബസ്സിടിച്ച് അപകടം;സ്റ്റീഫൻ ജോർജ് എക്സ് എം എൽ എക്ക് പരിക്ക്

കടുത്തുരുത്തി: നിർത്തിയിട്ടിരുന്ന കാറിന് പിന്നിൽ സ്വകാര്യ ബസ്സിടിച്ച് സ്റ്റീഫൻ ജോർജ് എക്സ് എം എൽ എക്ക് പരിക്ക്. കടുത്തുരുത്തി ജംഗ്ഷന് സമീപം ഇറക്കത്തിൽ ശനിയാഴ്ച വൈകിട്ട് 4 മണിയോടെയാണ് അപകടം. കേരള കോൺഗ്രസ്മാണി ഗ്രൂപ്പ് ജനറൽ സെക്രട്ടറിയായ സ്റ്റീഫൻ ജോർജ് തൃതല പഞ്ചായത്ത് തിരഞ്ഞെടുപ്പുമായി ബന്ധപ്പെട്ട് യാത്രയിലായിരുന്നു. കടുത്തുരുത്തി ജംഗ്ഷന് സമീപം ഉള്ള ഇറക്കത്തിൽ നിർത്തിയിട്ടിരുന്ന കാറിന് പിന്നിൽ സ്വകാര്യബസ് ഇടിക്കുകയായിരുന്നു. ഇടിച്ച ശേഷം കാറുമായി 200 മീറ്ററോളം ബസ് മുന്നോട്ട് ഓടി. തുടർന്ന് അപകടത്തിന് ഇടയാക്കിയ ബസിന്റെ ഡ്രൈവർ ഇറങ്ങിയോടുകയായിരുന്നു. കാറിൻ്റെ പിൻവശത്തിരുന്ന സ്റ്റീഫൻ ജോർജ്ജിനെ നിസ്സാര പരുക്കുകളോടെ മുട്ടുചിറയിലുള്ള സ്വകാര്യ ആശുപത്രിയിൽ പ്രവേശിപ്പിച്ചു. ഇടിയുടെ ആഘാതത്തിൽ കാറിൻ്റെ പിൻവശം പൂർണ്ണമായി തകർന്നു.