കടയ്ക്കൽ. കൂലി സംബന്ധിച്ചു സിഐടിയു തൊഴിലാളികളുമായുള്ള തർക്കത്തെ തുടർന്ന് വീട്ടുടമയായ മുൻ കേന്ദ്രീയ വിദ്യാലയ അധ്യാപിക സ്വന്തമായി വാഹനത്തിൽ നിന്ന് തറയോടുകൾ ഇറക്കി. കുമ്മിൾ തച്ചോണം പ്രിയ നിവാസിൽ പ്രിയ വിനോദ് ആണ് കഴിഞ്ഞ രാത്രി ഒറ്റയ്ക്ക് വാഹനത്തിൽ നിന്നും ഭാരമുള്ള 150 തറയോടുകൾ ഇറക്കിയത് . ലോഡ് ഇറക്കുന്നതിന് സിഐടിയു തൊഴിലാളികൾ അമിത കൂലി ചോദിച്ചു എന്ന് പ്രിയ പറയുന്നു .തച്ചോണം മുസ്ലിം പള്ളിക്ക് സമീപത്തു നിന്നു കിളിമാനൂർ റോഡിലാണ് പ്രിയ നിർമ്മിക്കുന്ന വീട് .രാത്രി വീടിനു മുന്നിൽ ലോറി എത്തിയപ്പോൾ ഇറക്കുന്നതിന് തൊഴിലാളികൾ കൂടുതൽ തുക ആവശ്യപ്പെട്ടു ഇത് സംബന്ധിച്ചു തർക്കമായി. മൂന്ന് തവണ വീടിൻറെ കോമ്പൗണ്ടിൽ വാഹനം കയറ്റിയെങ്കിലും തൊഴിലാളികളെ ലോഡ് ഇറക്കാൻ സമ്മതിച്ചില്ല .വീടിൻറെ കോമ്പൗണ്ടിൽ വാഹനം കയറ്റി പ്രിയയും ഭർത്താവും ലോഡ് ഇറക്കണം എന്നും മറ്റാരെയും ലോഡ് ഇറക്കാൻ പറ്റില്ല തൊഴിലാളികൾ ആവശ്യപ്പെട്ടു .തുടർന്ന് വീടിൻറെ കോമ്പൗണ്ടിൽ കയറ്റിയ വാഹനത്തിൽ നിന്നും പ്രിയ ഒറ്റയ്ക്ക് തറയോട് ഇറക്കുകയായിരുന്നു. ലോഡുകൾ ഇറക്കുന്നത് വരെ തൊഴിലാളികൾ വീടിനു മുന്നിൽ നിന്നു. വനിതാ പഞ്ചായത്ത് അംഗവും സ്ഥലത്തുണ്ടായിരുന്നു. പ്രിയയുടെ ഭർത്താവ് ഐ.വി. വിനോദ് മലപ്പുറത്ത് എസ്ഐ ആണ്. നേരത്തെ കേന്ദ്രീയ വിദ്യാലയത്തിൽ അധ്യാപികയായിരുന്ന പ്രിയ ഇപ്പോൾ സ്വതന്ത്ര പത്രപ്രവർത്തകയും കെപിസിസി മീഡിയ സെൽ അംഗവുമാണ്.
കൂലി സംബന്ധിച്ച് സിഐടി തൊഴിലാളികളുമായുള്ള തർക്കത്തിൽ രാത്രി ഒറ്റയ്ക്ക് തറയോടുകൾ ഇറക്കി അധ്യാപിക.
