കൊല്ലം: വെറുമൊരു പുസ്തക പ്രകാശനമായിരുന്നില്ല ഇന്ന് ഉച്ചയ്ക്ക് കൊല്ലം പ്രസ് ക്ലബ്ബിൽ നടന്നത്. മറിച്ച്, സത്യസന്ധതയും ധാർമികതയും കൈമുതലാക്കി ഒരു പ്രഥമാധ്യാപിക നടത്തിയ ജീവിതയാത്രയുടെ നേർസാക്ഷ്യമാണ് അവിടെ അവതരിപ്പിക്കപ്പെട്ടത്. യുവമേള പബ്ലിക്കേഷൻസ് പുറത്തിറക്കിയ, കെ. അമ്മിണിയമ്മയുടെ ‘അതിർവരമ്പുകൾക്കപ്പുറം’ (കഥാസമാഹാരം), ‘ഒരു പ്രഥമ അധ്യാപികയുടെ അനുഭവക്കുറിപ്പുകൾ’ എന്നീ പുസ്തകങ്ങളാണ് സാഹിത്യലോകത്തിന് സമർപ്പിക്കപ്പെട്ടത്.ഒരു പ്രഥമാധ്യാപികയുടെ കസേര പലപ്പോഴും സ്വസ്ഥതയില്ലാത്ത ഒന്നാണ്. സഹപ്രവർത്തകരുടെ സമ്മർദ്ദങ്ങളും അധികാര സ്ഥാനത്തിന്റെ വെല്ലുവിളികളും ആ കസേരയെ പ്രയാസമേറിയതാക്കും. എന്നാൽ, അമ്മിണിയമ്മ ടീച്ചർ ശരിയുടെ പക്ഷത്ത് ഉറച്ചുനിന്ന്, അഴിമതിക്ക് വഴങ്ങാതെ തന്റെ കടമ നിർവഹിച്ച ആ ജീവിത കഥയാണ് ഈ പുസ്തകത്തിലെ ഓരോ താളിലുമുള്ളതെന്ന് പ്രസാധകരായ യുവമേള പബ്ലിക്കേഷൻസ് പറയുന്നു. ആത്മാർത്ഥതയോടെ ജോലി ചെയ്യുമ്പോൾ ലഭിക്കുന്ന ആത്മസംതൃപ്തിക്ക് പകരമായി മറ്റൊന്നുമില്ലെന്ന് ഈ പുസ്തകം ഓർമ്മിപ്പിക്കുന്നു.മന്ത്രി ജെ. ചിഞ്ചുറാണി ഉദ്ഘാടനം നിർവഹിച്ചുമന്ത്രി ജെ. ചിഞ്ചുറാണി പുസ്തകപ്രകാശന സമ്മേളനം ഉദ്ഘാടനം ചെയ്തു. ജീവിതം ഒരു തുറന്ന പുസ്തകമാക്കിയുള്ള കെ. അമ്മിണിയമ്മയുടെ ഈ പുസ്തകങ്ങൾ, പുതിയ തലമുറയ്ക്ക് മാതൃകയാണെന്ന് മന്ത്രി പറഞ്ഞു. അഴിമതിയില്ലാത്ത ഒരു സമൂഹത്തെ കെട്ടിപ്പടുക്കാൻ ഇത്തരം ജീവിതാനുഭവങ്ങൾക്ക് വലിയൊരു പങ്കുണ്ടെന്നും മന്ത്രി ചൂണ്ടിക്കാട്ടി. പുസ്തകങ്ങളുടെ പ്രകാശനം ഡോ. കെ. പ്രസന്നരാജൻ നിർവഹിച്ചു.കൊല്ലം പ്രസ് ക്ലബ്ബിൽ സാഹിത്യവും മാധ്യമങ്ങളും ഒത്തുചേർന്നുകൊല്ലം മധു അധ്യക്ഷത വഹിച്ച ചടങ്ങിൽ, എം.ജി. സുനിൽകുമാർ സ്വാഗതം ആശംസിച്ചു. ജില്ലാ ലൈബ്രറി കൗൺസിൽ പ്രസിഡന്റ് കെ.ബി. മുരളീകൃഷ്ണൻ, അമ്പാടി മാസിക എഡിറ്റർ അമ്പാടി സുരേന്ദ്രൻ എന്നിവർ പുസ്തകങ്ങൾ ഏറ്റുവാങ്ങി.തുടർന്ന് നടന്ന കവിയരങ്ങ്, സദസ്സിനെ മറ്റൊരു ലോകത്തേക്കെത്തിച്ചു. ബാബു പാക്കനാർ, ആശ്രാമം ഓമനക്കുട്ടൻ, കണ്ടല്ലൂർ ലാഹിരി, കൊല്ലം ശേഖർ, ആറ്റൂർ ശരത്ചന്ദ്രൻ, അപ്സര ശശികുമാർ, സവിതദാസ്, വിനോദ് പ്രഭാകരൻ, ഉമസാന്ദ്ര, രാജൻ മടക്കൽ, കൃഷ്ണകുമാർ മരുത്തടി തുടങ്ങിയവർ കവിതകൾ ചൊല്ലി. കവി മുരുകൻ പാറശ്ശേരി, പി. ഉഷാകുമാരി, ചെമ്പകശ്ശേരി ചന്ദ്രബാബു എന്നിവർ ആശംസകൾ നേർന്നു. കെ. അമ്മിണിയമ്മ, കെ. അനിൽകുമാർ എന്നിവർ പ്രതിസ്പന്ദനം നടത്തി. നന്ദി പ്രകാശനം കെ. അനിൽകുമാർ നിർവഹിച്ചു.സാഹിത്യത്തെയും പത്രപ്രവർത്തനത്തെയും ഒരുപോലെ സ്നേഹിക്കുന്ന പ്രമുഖർ ഈ ചടങ്ങിൽ പങ്കെടുത്തു. ഒരു ജീവിതം അതിന്റെ നേരും നെറിയും തുറന്നുപറഞ്ഞപ്പോൾ അത് അനേകം പേർക്ക് പ്രചോദനമാകുന്ന കാഴ്ചയ്ക്കാണ് കൊല്ലം പ്രസ് ക്ലബ്ബ് സാക്ഷ്യം വഹിച്ചത്.
അധ്യാപക ജീവിതം പുസ്തകമായപ്പോൾ; കെ. അമ്മിണിയമ്മയുടെ രചനകൾ പ്രകാശനം ചെയ്തു
