രജനികാന്ത് അഭിനയിക്കുന്ന ജയിലര് നാളെ റിലീസ് ചെയ്യാനിരിക്കെ ധ്യാനിന്റെ ജയിലര് റിലീസ് മാറ്റിവച്ചു. ജയിലര് എന്ന പേരില് ഒരേ ദിവസം തമിഴ്, മലയാളം ചിത്രങ്ങള് തിയറ്ററുകളില് എത്തുന്നതുമായി ബന്ധപ്പെട്ട് വിവാദം ഉയര്ന്നിരുന്നു.
രജനികാന്ത് നായകനാവുന്ന തമിഴ് ജയിലര് വരുന്നതിനാല് ധ്യാന് ശ്രീനിവാസന് നായകനാവുന്ന തങ്ങളുടെ ചിത്രത്തിന് കേരളത്തില് പല സെന്ററുകളിലും തിയറ്റര് നിഷേധിക്കപ്പെടുകയാണെന്ന് ചിത്രത്തിന്റെ സംവിധായകന് സക്കീര് മഠത്തില് ആരോപിച്ചിരുന്നു.
ജയിലര് സിനിമ കേരളത്തില് മാത്രം 300 ഓളം തീയറ്ററുകളില് ഇറങ്ങുന്നുണ്ട്. ഈ ഘട്ടത്തില് ധ്യാനിന്റെ പടം റിലീസ് മാറ്റിവയ്ക്കുകയാണ്. ട്രേഡ് അനലിസ്റ്റ് എ.ബി.ജോര്ജിന്റെ പോസ്റ്റ് പ്രകാരം ചിത്രത്തിന്റെ റിലീസ് ഓഗസ്റ്റ് 18 ലേക്കാണ് മാറ്റിവച്ചിരിക്കുന്നത്.
നേരത്തെ മലയാളം ജയിലര് സംവിധായകന് സക്കീര് മഠത്തില് ചിത്രത്തിന് തീയറ്റര് ലഭിക്കുന്നില്ലെന്ന് ആരോപിച്ച് കൊച്ചിയിലെ ഫിലിം ചേംബര് ഓഫീസിന് മുന്നില് ഒറ്റയാള് സമരം നടത്തിയിരുന്നു. നിലവില് 40 തിയറ്ററുകള് മാത്രമാണ് തങ്ങളുടെ ജയിലറിന് ലഭിച്ചിരിക്കുന്നതെന്നും ഇപ്പോഴത്തെ നിലയില് കാര്യങ്ങള് മുന്നോട്ട് പോയാല് അതും നഷ്ടപ്പെടുമോ എന്ന ഭയമാണ് തനിക്കുള്ളതെന്നും അദ്ദേഹം അന്ന് പറഞ്ഞത്. എന്തായാലും കാര്യമായ തീയറ്റര് ലഭിക്കാത്തതോടെയാണ് ചിത്രത്തിന്റെ നിര്മ്മാതാക്കള് റിലീസ് നീട്ടിയത് എന്നാണ് വിവരം.
അതേ സമയം നെൽസന്റെ സംവിധാനത്തിൽ രജനികാന്ത് നായകനായെത്തുന്ന ‘ജയിലർ’ നാളെ റിലീസ് ആകുകയാണ്. സൺ പിക്ചേഴ്സിന്റെ ബാനറിൽ കലാനിധി മാരൻ നിർമിക്കുന്ന ജയിലർ തീയേറ്ററുകളിൽ എത്തുമ്പോൾ വാനോളം പ്രതീക്ഷയാണ് സിനിമ ലോകത്തിന്. ‘അണ്ണാത്തെ’ എന്ന ചിത്രത്തിന് ശേഷം 2 വർഷങ്ങൾക്കിപ്പുറമാണ് രജനി ചിത്രം തീയേറ്ററുകളിലെത്തുന്നത്.
